Azərbaycan, Bakı, 25 yanvar /Trend, müxbir M.Əliyev/
Azərbaycan Milli Televiziya və Radio Şurası bildirib ki, ölkədə rəqəmsal yayıma keçdikdən sonra xarici telekanalların ölkədə yayımının qarşısı alınacaq.
"Rəqəmsal yayıma keçəndə, xarici telekanalların Azərbaycan ərazisinə müdaxiləsinin qarşısı alınacaq. Xarici ölkələrin telekanallarının qeyri-qanuni müdaxiləsi məsələsi həllini tapacaq", - çərşənbə axşamı Trend-ə MTRŞ sədri Nuşirəvan Məhərrəmli bildirib.
2012-ci ilə kimi Bakı və Abşeron yarımadası rəqəmsal yayıma keçəcək, sonrakı dövrlərdə isə digər regionlarda da rəqəmsal yayım həyata keçiriləcək.
Məhərrəmli bildirib ki, texniki imkanlar baxımından istənilən bir ölkənin televiziya ötürücüsü digər ölkənin ərazisinə hava vasitəsi ilə girə bilir.
"Bunun qarşısını tam almaq mümkün deyil. Dünya ölkələrinin hamısında sərhəddən təqribən 50-70 km ərazidə qonşu ölkələrin televiziya və radio kanallarını izləmək mümkündür", - Məhərrəmli bildirib.