Azərbaycan, Bakı, 26 yanvar /Trend, müxbir Z.Əhmədova/
Bakıda yanvarın 26-dan 27-nə keçən gecə havanın nisbətən soyuyacağı gözlənilir. Bu barədə Trend-ə Azərbaycan Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosundan məlumat verilib.
"Yanvarın 26-dan 27-nə keçən gecə temperatur bir neçə dərəcə aşağı düşəcək", - Büronun baş hidroloqu Asif Verdiyev deyib.
Onun sözlərinə görə, yanvarın 26-sı gündüz saatlarında paytaxt regionunda havanın temperaturu 12-14 dərəcə təşkil edəcək, lakin axşamüstü cənub-qərb küləyini şimal küləyi əvəz edəcək, hava soyuyacaq. Cümə axşamı havanın temperaturu 7-9 dərəcəyə enəcək, o əlavə edib.
Həmçinin yaxın iki gündə atmosfer təzyiqinin qalxacağı gözlənilir ki, bu da meteohəssas bakılıların əhvalına mənfi təsir göstərə bilər, Verdiyev bildirib.