Azərbaycan, Bakı, 17 mart /Trend, müxbir K.Zərbalıyeva/
Baş prokuror yanında Korrupsiyaya Qarşı Mübarizə İdarəsinin səlahiyyətləri genişləndirilir.
Trend-in məlumatına görə, korrupsiyaya qarşı mübarizə sahəsində ixtisaslaşmış prokurorluq orqanı olan İdarə korrupsiya ilə bağlı cinayətlər üzrə əməliyyat-axtarış fəaliyyətini həyata keçirəcək.
Milli Məclisin sabah keçiriləcək iclasında bununla bağlı "Əməliyyat-axtarış fəaliyyəti haqqında" və "Prokurorluq haqqında" qanunlara əlavə və dəyişikliklər edilə bilər.
"Əməliyyat-axtarış fəaliyyəti haqqında" qanunun 5-ci maddəsinə nəzərdə tutulmuş əlavədə qeyd olunur ki, korrupsiya ilə bağlı cinayətlər üzrə əməliyyat-axtarış tədbirlərini yalnız korrupsiyaya qarşı mübarizə sahəsində ixtisaslaşmış prokurorluq orqanı, yaxud həmin prokurorluq orqanının yazılı tapşırığı əsasında təhqiqat orqanları həyata keçirirlər.
Qanunun 20-ci maddəsinə əlavədə nəzərdə tutulur ki, Korrupsiyaya Qarşı Mübarizə İdarəsinin əməliyyat-axtarış fəaliyyətini yerinə yetirməsi zamanı qanunların icrasına nəzarəti baş prokuror həyata keçirir.
Bu əlavə və dəyişikliklər müvafiq olaraq "Prokurorluq haqqında" qanuna da təklif olunub.