Azərbaycan, Bakı, 16 may /Trend, müxbir İ.İsabalayeva/
Türkmənistanın paytaxtı Aşqabadda keçirilən "İdman və turizm böyük dirçəliş dövründə" adlı beynəlxalq sərgidə Azərbaycanın görməli yerləri nümayiş olunub. Bu barədə Trend-ə Azərbaycanın Türkmənistandakı səfirliyindən məlumat verilib.
Məlumatda bildirilib ki, Türkmənistan tərəfinin dəvətinə əsasən sərgiyə qatılan səfirilik tədbirdə fəal iştirak edib.
Sərgidə səfirlik Azərbaycana dair müxtəlif materiallar, o cümlədən Qarabağ və Şuşa daxil olmaqla, Azərbaycanın səfalı və görməli yerlərinə dair broşürlər, jurnallar və CD-lər, habelə Azərbaycan Diplomatik Akademiyası barədə məlumatlar nümayiş etdirib.
Sərginin Azərbaycan səfirliyinə aid bölməsi qonaqlar, o cümlədən Türkmənistanın hökumət üzvləri, Məclisin rəhbərliyi, Türkmənistanda akkreditə olunmuş diplomatik nümayəndəliklərin əməkdaşları, KİV təmsilçiləri, eləcə də Aşqabad şəhərinin sakinləri və qonaqları tərəfindən maraqla izlənilib.