Azərbaycan, Bakı, 9 sentyabr /Trend, müxbir K.Zərbalıyeva/
Bakıda yeni dərs ilinin başlaması ilə əlaqədar yol hərəkəti təhlükəsizliyinin təmin edilməsi, yol qəza hadisələrinin sayının azalması məqsədlə paytaxtın yol polisi fəaliyyətini gücləndirəcək.
Bu barədə cümə günü Trend-ə məlumat verən Bakı şəhər Baş Dövlət Yol Polisi İdarəsinin bölmə rəisi Vaqif Əsədov bildirib ki, yay mövsümünün başa çatması ilə əlaqədar paytaxtda avtomobillərin sayı artıb, yollarda nəqliyyatın hərəkəti intensivləşib.
Ölkə ərazisində qeydiyyatda olan 1 milyon 15 mindən artıq nəqliyyat vasitəsinin 613 mindən çoxunun Bakı şəhərinin payına düşdüyünü, gün ərzində paytaxta 50 mindən artıq nəqliyyat vasitəsinin daxil olduğunu diqqətə çatdıran Əsədov bildirib ki, qeyd olunan hallar paytaxtda nəqliyyat sıxlığına səbəb olur.
Onun sözlərinə görə, yol polisi bu istiqamətində tədbirlər həyata keçirməklə hərəkətin təhlükəsizliyini təmin edəcək.
"Yaxşı olardı ki, bununla yanaşı, tərəfimizdən yol hərəkəti təhlükəsizliyinin təbliği də müsbət nəticə versin. Hərəkət iştirakçılarından xahiş edirik ki, yol qəza hadisələrinin, digər pozuntuların baş verməməsi üçün "Yol hərəkəti haqqında" qanunun tələblərini öyrənib onlara riayət etsinlər. Bu, hərəkət iştirakçısının və başqalarının təhlükəsizliyinin təmin olunması deməkdir", - bölmə rəisi deyib.
Paytaxtda qeydə alınan qəzaların səbəblərinə toxunan Əsədov bildirib ki, Bakıda qeydə alınan yol nəqliyyat hadisələrinin 49 faizi sürət həddinin aşılması səbəbindən baş verir. Təyin olunmayan yerlərdən keçən piyadaların avtomobillərlə vurulması isə hadisələrin 52 faizini təşkil edir.
Avtomobillərin yüksək sürətlə idarə olunması səbəbindən yaranan yol qəzalarının ağır nəticələndiyini deyən İdarə sözçüsü yol hərəkəti iştirakçılarına müraciət edərək onlardan yol polisi olmadan öz hərəkətlərini tənzimləməklərini xahiş edir.
"Sürücülər qoşa xəttin tələbini pozaraq əks istiqamətli yol zolağına daxil olmaqla həm tıxac yaradır, həm də yol qəzalarının sayını artırır. Yol hərəkəti iştirakçılarının yol mədəniyyəti yüksəlməlidir. Bu gün ölkədə əhalinin 9 nəfərdən birinə 1 avtomobil düşür. Ölkədə bu inkişaf tempi ilə gələcəkdə bir ailədə 2-3 avtomobil olacaq. Bu da sürücülərdən nizam-intizamlı olmağı, yol hərəkət qaydalarına əməl etməyi tələb edir", - Əsədov vurğulayıb.