Azərbaycan, Bakı, 16 dekabr /Trend/
Rusiyanın paytaxtı Moskvada boks üzrə tələbələr arasında Avropa çempionatına yekun vurulub.
Trend-in Boks Federasiyasının rəsmi saytına istinadən verdiyi məlumata görə, yarışa 7 boksçu ilə yollanmış milli komandamız 5 bürünc medala sahib olub.
Kamran Məlikov (52 kq), Şaban Şahpələngov (56 kq), Elnur Zeynalov (64 kq), Rauf Rəhimov (81 kq) və Fərid Paşayev (91+ kq) Avropa çempionatını 3-cü yerdə başa vurublar. Tələbələrin yarışında 18 ölkənin 100-ə yaxın boksçusu mübarizə aparıb.
Boksçularımızdan yalnız Salman İbrahimov (60 kq) və Yolçu Zeynalov (75 kq) mükafatçılar sırasına düşə bilməyiblər. Ceyhun Əbiyev yarışda ölkəmizi hakim kimi təmsil edib.