Azərbaycan, Bakı, 24 dekabr / Trend, müxbir K.Zərbalıyeva/
Azərbaycan beynəlxalq sorğuda inkişaf etməkdə olan ölkələr qrupu üzrə 51 ölkə içərisində 8-ci yeri tutub.
Azərbaycan Marketinq Cəmiyyətinin mətbuat xidmətindən şənbə günü Trend-ə verilən məlumata görə, bu ilin son aylarında dünyanın ən nüfuzlu araşdırma və sorğu şirkətlərindən biri olan "Gallup İnternational"dünyanın 51 ölkəsində "Qlobal Ümid və Ümidsizlik Barometri" adlı sorğu aparıb.
Sorğuda Azərbaycan 8-ci yerdə qərarlaşıb.
"Bu da o deməkdir ki, ölkə əhalisi gələcəyə ümid bəsləyir, növbəti ildə hazırkı ilə nisbətən əhalinin rifah səviyyəsinin daha da yüksələcəyinə inanır və ölkəmizin 2012-ci ildə inkişafına böyük nikbinliklə baxır", məlumatda bildirilir.
Sorğuya əsasən Azərbaycan cari ildə ən yüksək irəliləyiş əldə etmiş ölkələr sırasında ilk yerlərdən birini tutur.
Eyni zamanda, araşdırma göstərir ki, ümidsizlik dərəcəsi Avropa və Şimali Amerikada dünyanın digər ölkələri ilə müqayisədə daha yüksəkdir. Hesabatda qeyd edilir ki, son 34 il ərzində keçirilən sorğulara nisbətən bu ilin göstəricilərini dünya üzrə ən pessimist göstəricilər hesab etmək olar.
Sorğu bu il dünya ölkələri üzrə 45 000-dən artıq respondent arasında aparılıb.
Etibarlı və yüksək peşəkarlıqla fərqlənən metodologiya, respondentlərin geniş əhatə dairəsi və ümumi obyektivliklə seçilən bu reytinqdə Azərbaycanın yüksək templərlə irəliləməsi ölkədə aparılan islahatlar və siyasətin əhali tərəfindən yüksək qiymətləndirilməsi və nəticədə gələcəyə inamla baxmasına sübutdur.
"Gallup International" araşdırma və sorğu Assosiasiyası 60 ildən artıq bir dövrdə fəaliyyət göstərir və dünyada sosial, siyasi və iqtisadi tədqiqatlar üzrə aparıcı araşdırma qruplarından biridir. "Qlobal Ümid və Ümidsizlik Barometri" hesabatı isə 1977-ci ildən başlayaraq ildə bir dəfə hazırlanır.