Azərbaycan, Bakı, 14 fevral / Trend müxbir İ.İsabalayeva/
Tələbə Qəbulu üzrə Dövlət Komissiyasının (TQDK) sədri Məleykə Abbaszadə və komissiyanın sektor müdiri Oleq Şelaqinov Qazaxıstanın Elm və Təhsil Nazirliyinin Milli Test Mərkəzinin dəvəti ilə bu ölkəyə səfər edəcəklər.
TQDK-nın mətbuat xidmətindən çərşənbə axşamı Trend-ə verilən məlumata görə, səfərin məqsədi Astana şəhərində fevralın 16-17-də "Şagirdlərin yekun attestasiyası və ali məktəblərə qəbul: təcrübə və inkişaf perspektivləri" mövzusunda keçiriləcək elmi-praktik seminarda iştirak etməkdir.
Seminarın keçirilməsinin məqsədi buraxılış və qəbul imtahanlarının keçirilməsində təkmilləşdirmə işləri aparılması üçün xarici ölkələrin, o cümlədən Azərbaycan TQDK-nın təcrübəsinin öyrənilməsidir.
Qeyd edək ki, Qazaxıstanda 2004-cü ildən etibarən vahid milli test imtahanları (VMT) keçirilir. VMT ümumtəhsil məktəblərinə buraxılış imtahanı və onun nəticələri əsasında ali məktəblərə qəbul həyata keçirir.