Azərbaycan, Bakı, 3 aprel / Trend müxbir İ.İsabalayeva/
Milli Məclisin Sosial siyasət komitəsi Təhsil Nazirliyinin təqdim etdiyi "İnkluziv təhsil haqqında" qanun layihəsinin ayrıca qanun kimi qəbulunu tövsiyə etməyib.
Təhsil Nazirliyinin De-institutlaşma və Uşaqların Müdafiəsi İdarəsinin rəisi Məlahət Hacıyeva çərşənbə axşamı Trend-ə bildirib ki, Milli Məclis "Xüsusi təhsil haqqında" qanuna müvafiq müddəaların əlavə edilməsini məqsədəuyğun sayıb.
Hazırda inkluziv təhsillə bağlı müddəaların "Xüsusi təhsil haqqında" qanuna əlavə edilməsi üçün mütəxəssislər (hüquqşünaslar) tərəfindən müəyyən işlər görülür.
Hacıyeva bildirib ki, "Xüsusi təhsil haqqında" qanunda inteqrasiyalı təhsil nəzərdə tutulub. Belə ki, inteqrasiya təlimli təhsil müəssisəsi sağlamlıq imkanları məhdud şəxslərlə sağlam şəxslərin birgə təhsil alması üçün xüsusi şərait yaradılmış ümumi təyinatlı təhsil müəssisəsidir.
İnteqrasiyalı təhsil adi ümumtəhsil müəssisəsində xüsusi siniflərin və yaxud da xüsusi məktəbdə tipik siniflərin yaradılmasına imkan verir. Amma həmin qanunda adi ümumtəhsil məktəbində sağlamlıq imkanları məhdud uşağın digər tipik uşaqlarla eyni sinifdə təhsil almasına imkan verən inkluziv təhsilin təşkili ilə bağlı bəndlər öz əksini tapmayıb.
