Azərbaycan, Bakı, 19 may /Trend, müxbir K.Zərbalıyeva/
Bu gündən "Eurovision 2012" mahnı müsabiqəsi ilə əlaqədar Bakıda nəqliyyatın hərəkəti məhdudlaşdırılıb.
Respublika Baş Dövlət Yol Polisi İdarəsinin şöbə rəisi Kamran Əliyev şənbə günü Trend-ə bildirib ki, mayın 19-dan 28-dək, yəni "Eurovision 2012" mahnı müsabiqəsi ərəfəsində avtomobillər Bakı-Salyan yolunun 14-cü kilometrliyindən Bayıl istiqamətinə buraxılmayacaq. Avtomobillər kənarkeçmə yolu istiqaməti ilə Bakıya daxil ola biləcəklər.
Əliyev bildirib ki, həmçinin "20-ci Sahədən" Bayıl istiqamətinə avtomobillərin hərəkəti məhdudlaşdırılıb. Həmin ərazidə avtomobillərin hərəkəti "20-ci sahə" dairəsindən Badamdar qəsəbəsinə istiqamətləndirilib.
Bundan əlavə, Bayıl qəsəbəsindən Neftçilər prospektinə avtomobillərin hərəkəti məhdudlaşdırılıb. Burada avtomobillər Bayıl qəsəbəsindən Xanlar küçəsinə, oradan isə "Dağüstü Park" yolu ilə Parlament prospekti istiqamətinə yönəldilib.
Daha sonra Bülbül və Azadlıq prospektləri ilə Nizami küçəsinin kəsişmələrindən Neftçilər prospektinə doğru avtomobillərin hərəkəti məhdudlaşdırılıb.
Eyni zamanda Niyazi küçəsindən Neftçilər prospektinə avtomobillərin hərəkəti məhdudlaşdırılıb, burada avtomobillərin hərəkəti Niyazi küçəsindən sola İstiqlaliyyət küçəsinə yönəldilib.
İstiqlaliyyət küçəsi ilə Azərbaycan prospektinin kəsişməsindən Əziz Əliyev küçəsinə doğru avtomobillərin hərəkəti məhdudlaşdırılıb.
Eyni zamanda Yusif Səfərov küçəsindən 28 May küçəsinə, Yusif Səfərov, Afiyəddin Cəlilov küçəsinin kəsişmələrindən Üzeyir Hacıbəyov küçəsinə avtomobillərin hərəkəti məhdudlaşdırılıb.
Heydər Əliyev prospektindən Yusif Səfərov küçəsinə nəqliyyatın hərəkəti Təbriz küçəsinə yönəldilib.
Əliyev deyib ki, "Eurovision 2012" müsabiqəsində tədbir iştirakçılarının daşınması üçün paytaxtda 5 məntəqə yaradılıb. Səməd Vurğun parkının yanında, Azadlıq meydanında, Muzey Mərkəzinin yanında, Azneft meydanında, "Dalğa Plaza"nın yanında yaradılan məntəqələrdə avtobuslar tədbir iştirakçılarını daşıyıb.
Tədbir yerinin yaxınlarında avtomobillərin park edilməsinin mümkünsüzlüyünü nəzərə alaraq Respublika Yol Polisi vətəndaşlara müraciət edərək bildirir ki, "Eurovision 2012" müsabiqəsində iştirak etmək istəyənlər öz şəxsi maşınlarından istifadə etməsin və həmin məntəqələrə gələrək avtobusların xidmətindən yararlansınlar. Və yaxud yeni salınan Dənizkənar Bulvar ilə piyada getsinlər.
"Eurovision"la əlaqədar bu gündən Bakıda bəzi küçə və prospektlərdə nəqliyyatın hərəkəti məhdudlaşdırılıb
Respublika Baş Dövlət Yol Polisi İdarəsinin şöbə rəisi Kamran Əliyev şənbə günü Trend-ə bildirib ki, mayın 19-dan 28-dək, yəni "Eurovision 2012" mahnı müsabiqəsi ərəfəsində avtomobillər Bakı-Salyan yolunun 14-cü kilometrliyindən Bayıl istiqamətinə buraxılmayacaq. Avtomobillər kənarkeçmə yolu istiqaməti ilə Bakıya daxil ola biləcəklər
