...

"Tolişi Sədo" qəzetinin baş redaktoru İrana casusluqda ittiham olunur

Cəmiyyət Materials 4 İyul 2012 15:03 (UTC +04:00)
Baş Prokurorluq və Daxili İşlər Nazirliyinin mətbuat xidmətləri "Tolişi Sədo" qəzetinin təsisçisi və baş redaktoru Hilal Məmmədov barəsindəki cinayət işi üzrə məlumat yayıblar.
"Tolişi Sədo" qəzetinin baş redaktoru İrana casusluqda ittiham olunur

Azərbaycan, Bakı, 4 iyul /Trend, müxbir K.Zərbalıyeva/

Baş Prokurorluq və Daxili İşlər Nazirliyinin mətbuat xidmətləri "Tolişi Sədo" qəzetinin təsisçisi və baş redaktoru Hilal Məmmədov barəsindəki cinayət işi üzrə məlumat yayıblar.

Trend-ə daxil olan məlumatda bildirilir ki, son vaxtlar bəzi kütləvi informasiya vasitələrində "Tolişi Sədo" qəzetinin təsisçisi və baş redaktoru Hilal Məmmədovun peşə fəaliyyəti ilə əlaqədar qanunsuz həbs edilməsi barədə ictimai rəyi çaşdırmaq məqsədi güdən, reallıqdan uzaq olan, təxribat xarakterli məlumatlar yayılmaqdadır.

Məlumatda deyilir ki, Hilal Məmmədovun barəsində cinayət təqibinin başlanması və həbs qətimkan tədbirinin seçilməsi konkret ictimai-təhlükəli əməl törətməsi ilə əlaqədardır.

Birgə məlumatda qeyd olunur ki, Hilal Məmmədov xarici dövlətlərdən birinin xüsusi xidmət orqanları tərəfindən əməkdaşlığa cəlb edilərək Azərbaycan Respublikasının dövlət təhlükəsizliyi və ərazi toxunulmazlığı əleyhinə fəaliyyət göstərməsi, milli, irqi, dini nifrət və düşmənçiliyin salınması, habelə narkotik vasitələrin qanunsuz dövriyyəsi ilə məşğul olması barədə vətəndaş müraciəti və Daxili İşlər Nazirliyinə daxil olmuş əməliyyat məlumatı əsasında Cinayət-Prosessual Məcəlləsinin və "Əməliyyat-axtarış fəaliyyəti haqqında" qanunun müddəalarına riayət edilməklə 2012-ci il iyunun 21-də saxlanılıb.

İstintaqla müəyyən edilib ki, uzun illər ərzində jurnalist peşəsinin və mədəniyyət mərkəzinin rəhbəri vəzifəsinin imkanlarından yararlanan Məmmədov 1992-ci ildən etibarən İranın xüsusi xidmət orqanının əməkdaşı Əbdoli Əli Həmzəli oğlu tərəfindən məxfi əməkdaşlığa cəlb olunaraq Azərbaycan Respublikasının suverenliyi, dövlət təhlükəsizliyi və ərazi toxunulmazlığı zərərinə fəaliyyət göstərib, bunun müqabilində mütəmadi şəkildə birbaşa maddi vəsait alıb.

Verilmiş tapşırıqlar əsasında Hilal Məmmədov respublikamıza qarşı düşmənçilik fəaliyyəti aparmaqda istifadə olunması üçün zəruri məlumatları toplayaraq İranın kəşfiyyat qurumuna ötürüb, eləcə də belə məlumatlara malik şəxsləri müəyyənləşdirib həmin təşkilatın nümayəndələri ilə əlaqələndirərək casusluğu ilə dövlətə xəyanət edib.

Cinayətkar fəaliyyətini davam etdirən Məmmədov dövlətin konstitusiya quruluşunun təhlükəsizliyini sarsıtmaq məqsədilə yuxarıda adıçəkilən Əbdoli Əli Həmzəli oğlu və digərləri ilə cinayət əlaqəsinə girərək, qulluq mövqeyindən istifadə etməklə müxtəlif vaxtlarda İranda keçirilən konfranslardakı çıxışlarında, "Səhər-2" televiziya kanalındakı müsahibələrində, "Tolişi Sədo" qəzetində dərc olunmuş məqalələrində və tərcümə etdirərək yaydığı kitablarda respublikamızın ərazisində yaşayan azsaylı xalqların həyatına, mədəniyyətinə, ənənələrinə, tarixinə inam və hörməti sarsıdan fikirlər bildirib, aşkar surətdə milli ayrı-seçkiliyin və düşmənçiliyin salınmasına yönələn hərəkətlər edib.

Hilal Məmmədov saxlanılarkən hal şahidlərinin iştirakı ilə keçirilmiş baxış zamanı üzərində və yaşadığı mənzildə ümumi çəkisi 33,183 qram olan narkotik vasitə - heroin, həmçinin qanunsuz fəaliyyətində istifadə etdiyi kompüter və digər informasiya daşıyıcıları aşkar edilərək götürülüb. Yuxarıda göstərilənlərə əsasən, Hilal Məmmədov Cinayət Məcəlləsinin 274-cü (dövlətə xəyanət), 283.2.2-ji (milli, irqi, sosial və ya dini nifrət və düşmənçiliyin salınması) və 234.4.3-cü (qanunsuz olaraq külli miqdarda narkotik vasitələri əldə etmə, saxlama və satma) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.

İstintaq zamanı Hilal Məmmədovun qanunvericilikdə təsbit olunan hüquqi yardım almaq, müdafiəçiyə malik olmaq, ifadə verməkdən, istintaq hərəkətində iştirakdan imtina etmək hüquqları tam təmin olunub, bütün prosessual hərəkətlər müdafiəçisinin iştirakı ilə həyata keçirilib.

Cinayət işinin mürəkkəb və çoxepizodlu olması baxımından istintaqın tamlığının, hərtərəfliliyinin və obyektivliyinin təmin edilməsi məqsədilə Baş Prokurorluğun, Milli Təhlükəsizlik və Daxili İşlər nazirliklərinin əməkdaşlarından ibarət birgə istintaq-əməliyyat qrupu yaradılmaqla təxirəsalınmaz istintaq hərəkətləri və əməliyyat-axtarış tədbirləri həyata keçirilir.

Xəbər lenti

Xəbər lenti