Azərbaycan, Bakı, 13 may /Trend, müxbir İ.İzzət/
Həftəsonu Gəncədə avtoxuliqanlara qarşı reyd keçirilib.
Trend Kəpəz TV-yə istinadən xəbər verir ki, keçirilən reydlər zamanı ümumilikdə 78 avtomobil cərimə meydançasına aparılıb, 2 sürücüyə avtoxuliqanlıq etdiyi üçün bir sutkalıq həbs cəzası verilib, 10 nəfər isə sükan arxasında sərxoş vəziyyətdə əyləşdiyi üçün saxlanılıb.
Yoxlamalar zamanı əsas hədəf avtomobilin konstruksiyasına dəyişiklik edən, kustar üsulla hazırlanmış pərdə və plyonkadan yararlanan, eləcə də sükan arxasına sərxoş və sənədsiz əyləşən sürücülər olub.
Reydlərdə yol polisinin "Saxla!" işarəsinə məhəl qoymayanlar da olub. Həmin avtomobillər barəsində axtarış elan edilərək, müvəqqəti dayanacağa qoyulması təmin edilib.
Gəncə şəhər Dövlət Yol Polisi Şöbəsinin rəisi Rəhim Zalov sürücülərə xəbərdarlıq edərək, onları qaydalara əməl etməyə cağırıb. Onun sözlərinə görə, eyni hal təkrarlanarsa, həmin sürücülərin barəsində daha ciddi tədbirlər görüləcək.
Gəncədə Yol Polisinin reydləri qarşıdakı günlərdə də davam etdiriləcək.