Azərbaycan, Bakı, 30 iyul /Trend, müxbir M.Əliyev/
Azərbaycanda dövlət dilinin istifadəsində yaranan problemlərə dərhal reaksiya vermək məqsədilə "qaynar xətt" yaradılır.
Millət vəkili, Milli Məclisin Mədəniyyət komitəsinin sədri Nizami Cəfərov çərşənbə axşamı Trend-ə bildirib ki, insanlar hardasa dil ilə bağlı problem görsələr, "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı"na müvafiq olaraq Rabitə və İnformasiya Texnologiyaları Nazirliyinin iştirakı ilə yerli icra hakimiyyəti orqanlarında fəaliyyət göstərəcək "qaynar xətt"ə müraciət edə bilərlər.
Millət vəkili qeyd edib ki, "qaynar xətt" Azərbaycan dilinin dövlət dili kimi inkişafında və dilin təmizliyinin qorunmasında, eləcə də ədəbi dilin normalarına əməl olunmamasının, reklamlarda, ictimai iaşə obyektlərində Azərbaycan dilinin leksik və qrammatik qaydalarının pozulmasının qarşısının alınmasında ictimaiyyətin iştirakının təmin edilməsi və operativ tədbirlər görülməsi məqsədilə yaradılır.
Cəfərov vurğulayıb ki, ən mühüm məsələlərdən biri dövlət və cəmiyyət arasında dilin qorunması ilə bağlı əlaqələrin gücləndirilməsidir:
"Dil milli, ictimai təfəkkürün və düşüncənin inkişafı fonunda diqqətdən kənarda qala bilməz. Qloballaşma prosesi şəraitində dilin qorunması və inkişaf etdirilməsi probleminə iki cür yanaşma mövcuddur. Bu yanaşmalardan biri milli xüsusiyyətlərin, o cümlədən dilin qorunub saxlanmasından ibarətdir, ikinci yanaşma isə ölkənin və onun dilinin dünyaya açıq olması məsələsidir".