...

Vətən müharibəsi qaziləri "Köhnə çamadanlar" filmini izləyiblər (FOTO)

Cəmiyyət Materials 28 Sentyabr 2022 17:43 (UTC +04:00)
Vətən müharibəsi qaziləri "Köhnə çamadanlar" filmini izləyiblər (FOTO)

Bakı. Trend:

27 sentyabr-Anım günündə "Gənclik Mall" TM-də yerləşən "CinemaPlus" premium kinoteatrında media nümayəndələri və ekran işində rol almış Vətən müharibəsi qaziləri üçün “Köhnə çamadanlar” filminin nümayişi olub.

Tədbir iştirakçıları əvvəlcə torpaqlarımızın azadlığı və ərazi bütövlüyü naminə canlarından keçmiş Vətən övladlarının xatirəsini anıblar.

Nümayişdən öncə yaradıcı heyət, filmdə şəhid atası obrazını canlandıran Xalq artisti Məmməd Səfa, eləcə də ekran işinin real qəhrəmanları və 44 günlük Vətən müharibəsinin qaziləri çıxış ediblər. Birinci Qarabağ müharibəsinin qadın iştirakçıları Aliyə Piriyeva, Kəmalə Qəhrəmanova, Xanımzər Həsənova, Məhəbbət Paşayeva və digər qonaqlar xatirələrini, eləcə də şanlı Zəfər tariximizin qürurverici məqamlarına dair hisslərini bölüşüblər. Haqq savaşımız və qəhrəmanlarının həyat hekayələrinin geniş tamaşaçı auditoriyasına təqdimatı baxımından filmin mühüm əhəmiyyət kəsb etdiyi vurğulanıb. Qarabağ həqiqətləri, haqq mücadiləmizin gələcək nəsillərə, həmçinin dünya ictimaiyyətinə çatdırılması işində belə filmlərin rolu yüksək qiymətləndirilib. Ekran işi müharibənin ağrılarını hələ də fiziki və mənəvi yük kimi daşıyan insanların yanğısını, köhnəlməyən xatirələrini təbii və təsirli çalarlarla ekrana gətirir.

Sonra “Köhnə çamadanlar” filmi nümayiş etdirilib.

Xatırladaq ki, real həyat hekayələri əsasında çəkilən film müharibənin qadınların taleyində buraxdığı ağrılı izlərə ekran həyatı verib. Birinci Qarabağ müharibəsində torpaqlarından didərgin düşən, işgəncələrə məruz qalan, doğmalarını itirən müxtəlif qadın obrazları, onların yaşadıqları psixoloji travmalar filmdə öz əksini tapıb. Eyni zamanda ekran əsərində 44 günlük Vətən müharibəsini və qələbə sevincini əks etdirən sənədli kadrlar da yer alıb.

Filmin quruluşçu rejissoru Saida Haqverdiyeva, ssenari müəllifi Sevda Sultanova, görüntü rejissoru Şahmar Səfəroğlu, montaj rejissoru Rza Almasi Pərqu, quruluşçu rəssamı Əfşan Əsədova, bəstəkarı Vuqar Camalzadə, art direktoru Tahir Əliyev, baş prodüseri Pərvinə İsmayılova, icraçı prodüserləri Kəmalə Nəhmətova və Nicat Məmmədov, redaktoru Həmidə Rüstəmova, menecerlər Aynurə Əkbərova və Gülər Məlikdir.

Ekran əsərində rolları Xalq artistləri Məmməd Səfa, Pərvanə Qurbanova, Əməkdar artistlər Gülzar Qurbanova, Nəsibə Eldarova, Şəfəq Əliyeva, aktyorlar Zemfira Əbdülsəmədova, Zümrüd Qasımova, Ülviyyə Əliyeva, Zülfiyyə Qurbanova, Oksana Rəsulova, Zülfiyyə Nəzər Məmmədova, Rada Nəsibova, Zarina Qurbanova, Aygün Fətullayeva, Türkay Cəfərli, Könül Qasımova, Səmimi Fərhad, Aqil M. Quliyev, Namiq Ağayev, Vüqar Hacıyev, Cavanşir Məhərrəmov, Rəsmiyyə Nurməmmədova, Qızılgül Quliyeva və başqaları oynayırlar.

Psixoloji dram janrında çəkilən filmdə İkinci Qarabağ Müharibəsinin iştirakçıları, Dövlət Sərhəd Xidmətinin Sərhəd qoşunlarında xidmət edən hərbçilər, eləcə də sağlamlıq imkanları məhdud istedadlı şəxslər də iştirak ediblər.

2021-ci ilin payızından çəkilişlərinə başlanılan "Köhnə çamadanlar” tammetrajlı bədii filmi Əmək və Əhalinin Sosial Müdafiəsi Nazirliyi, DOST İnklüziv İnkişaf və Yaradıcılıq Mərkəzi, "RS Production” və "OYUN” inklüziv teatr Məhdud Məsuliyyətli Cəmiyyətinin birgə əməkdaşlığı çərçivəsində ərsəyə gətirilib.

Qeyd edək ki, film sentyabrın 29-dan etibarən bütün "CinemaPlus" kinoteatrlar şəbəkəsində nümayiş olunacaq.

Xəbər lenti

Xəbər lenti