Bakı. Trend:
Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdış davam etdirilir. Qayıdış proqramına uyğun olaraq növbəti dəfə Xocavənd rayonunun Qırmızı Bazar qəsəbəsi və Sos kəndinə qayıdış karvanı yola salınıb.
Trend-in Qarabağ bürosunun xəbərinə görə, bu mərhələdə Xocavənd rayonunun Qırmızı Bazar qəsəbəsinə 21 ailədən 89 nəfər Sos kəndinə isə 20 ailə olmaqla 80 nəfər Füzuli rayonunun Alıxanlı kənd keçid postundan yola salınıb.
Doğma yurda qayıdan sakinlər hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban xanım Əliyevaya təşəkkür ediblər.
Onlar, həmçinin torpaqlarımızı işğaldan azad edən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçən şəhidlərimizə rəhmət diləyiblər.
