Azərbaycan və Küveyt turizm sahəsində əməkdaşlıq barədə razılaşmanı paraflaşdırır. Bu barədə Trend ə Azərbaycanın Gənclər, İdman və Turizm Nazirliyinin Turizm Baş İdarəsinin rəisi Aydın İsmiyev məlumat verib.
Sənəd dekabrın 11-14-də Azərbaycanın gənclər, idman və turizm naziri Əbülfəz Qarayevin başçılıq etdiyi nümaynədə heyətinin Küveytə səfəri çərçivəsində paraflaşdırılacaq. Razılaşmanın layihəsi artıq iki ölkə nazirləri səviyyəsində razılaşdırılıb.
Sənəd iki ölkənin turizmin inkişafına qarşılıqlı investisiyaların cəlb edilməsi, birgə müəssisələrin yaradılması, Azərbaycanın və Küveytin görməli yerlərinə turizm səfərlərinin təşkili üzrə əməkdaşlığı nəzərdə tutur.
Səfər Küveytin informasiya nazirinin dəvəti üzrə həyata keçiriləcək. Səfər gedişində əməkdaşlığın konkret istiqamətləri üzrə geniş fikir mübadiləsi aparılacaq.
