Yanvarın 27-də Azərbaycan Respublikası Vəkillər Kollegiyasının Rəyasət heyətinin keçiriləcək növbəti iclasında vəkillərin sayının artılırması ilə bağlı məsələ müzakirə olunacaq. Bu barədə Trend ə VK-nın sədr müavini Fərhad Nəcəfov məlumat verib.
"Vəkillərin sayının artırılması Prezident İlham Əliyevin bir neçə gün əvvəl imzaladığı "Azərbaycan Respublikasının Bəzi Qanunvericilik Aktlarına Dəyişikliklər və Əlavələr Edilməsi Haqqında" Fərmanındakı tövsiyələrdən irəli gəlir. Həmin fərmanla yeni məhkəmələrin yaradılmasını nəzərə alsaq, vəkillərin sayının artırılması və regionlarda əhaliyə göstərilən hüquqi yardımın səmərəliliyinin artırılması hazırda Vəkillər Kollegiyası qarşısında duran ən vacib məsələlərdən biridir" - deyə sədr müavini söyləyib.
İclasda həmçinin VK-ya üzv olmaq üçün edilmiş müraciətlərdən 13-nə baxılacağı da gözlənilir.
