Gəncədə dünyaya gələn hər 10 uşaqdan 6-nın çəkisi normadan artıqdır. Bu barədə məlumatı Trendə "Higar" Doğuşa Yardım Mərkəzinin baş həkimi Solmaz Quliyeva verib.
Onun sözlərinə görə, yeni doğulan uşaqlarda normal çəki 3,5 kiloqram olduğu halda, son vaxtlar Gəncədə dünyaya gələn körpələrin çəkisi 6 kq-a yaxın olur. S.
Quliyeva bildirir ki, Mərkəz 2005-2006 cı illərdə bununla bağlı müşahidələr də aparıb. Belə ki, son iki il ərzində mərkəzdə dünyaya gələn 910 uşağın 546-sı məhz artıq çəki ilə doğulublar. "Ötən il belə uşaqların əksəriyyəti şəkərli anaların evladları olurdu. Hazırda uşaqların artıq çəkilə doğulmasının digər səbəblərinin olduğu da müşahidə edilir. Belə ki, ananın hamiləlik dövründə normadan artıq vitamin, kalorili qidalar qəbul etməsi və çox istirahət etməsi dölün də artıq çəkili olması ilə nəticələnir" - deyə S.Quliyeva qeyd etdi.
Müsahib qeyd edir ki, artıq çəki ilə doğulan uşaqlarda bir sıra problemlər meydana çıxır. İlk növbədə onlar doğuş zamanı zədə alır. Bu da onlarda beyindaxili təyziqə, qollarda iflicin yaranmasına səbəbə olur. Bundan başqa uşaqların görmə və eşitmə orqanlarında zəiflik halları da meydana çıxır.
