Gündəlik nəşr olunan qəzetlərin rəhbərləri bu nəşrlərin satış qiymətinin artırılmasına dair qərar qəbul ediblər. Bu barədə Trend ə "Yeni Müsavat" qəzetinin baş redaktoru Rauf Arifoğlu məlumat verib.
Qeyd edək ki, bu gün - yanvarın 9-da gündəlik qəzetlərin baş reaktorlarının fövqəladə toplantısı olub. Toplantıda ölkədə enerjidaşıyıcıların və digər sahələrdə qiymətlərin artırılmasının nəşrlərə də təsir göstərməsi müzakirə olunub. Qəzet redaktorları belə qənaətə gəliblər ki, bu vəziyyətdən çıxmaq üçün nəşrlərin satış qiymətini artırmağa məcburdurlar: "Ona görə də yekdilliklə qərara gəlindi ki, qəzetlərin satış qiyməti artırılsın. Gələn həftənin birinci günü baş redaktorlar yenidən toplanaraq qiymətin hansı gündən etibarən və nə qədər artırılmasına qərar verəcəklər"-deyə R.Arifoğlu bildirib.
Onun sözlərinə görə, redaktorların toplantısına mətbəələrin nümayəndələri də çağırılacaq və onların iştirakı, razılığı ilə qiymətlər müəyyənləşdiriləcək. R.Arifoğu qeyd edib ki, əgər mətbəələr gözlənilmədən öz qiymətlərini artırmasalar, bu həftə ərzində qəzetlərin satış qiyməti sabit qalacaq. Əgər gələn həftəyə qədər mətbəə xərcləri artırılsa, redaktorların fövqəladə toplansı çağırılacaq və qiymət artımı dərhal müəyyən ediləcək. Xatırladaq ki, bugünkü qərara "Yeni Müsavat", "Azadlıq", "Bizim yol", "Milli yol", "Ekspress", "Bakı xəbər", "Gündəlik Azərbaycan", "Şərq", "24 saat" qəzetləri qoşulub. Bir neçə nəşr - "525-ci qəzet", "Ayna"-"Zerkalo", "Exo" qəzetləri isə satış qiymətini artıq 50 faiz artırıblar.
