Azərbaycan,Bakı/ Trend , müxbir K. Zərbalıyeva/ Beynəlxalq Qırmızı Xaç Komitəsinin (BQXK) Dağlıq Qarabağ ofisinin nümayəndələri ermənilər tərəfindən əsir götürülən azərbaycanlı ilə 5-ci dəfə görüşüblər. BQXK-nın Azərbaycan nümayəndəliyinin mətbuat xidmətindən Trend ə bildiriblər ki, qurum nümayəndələri avqustun 8-də əsirlə görüş zamanı onun saxlanma şəraiti ilə bağlı monitorinq aparıblar, BQXK-nın tibbi eksperti onun psixoloji durumunu qiymətləndirib. BQXK nəticələri məxfi saxladığından əlavə məlumat verməyib. Nəticə barədə əsirin ailəsi və hakimiyyət nümayəndələri ilə konfidensial danışıqlar aparılır. Bu il iyunun 30-da cəbhə xəttinin Ağdam istiqamətində əsir götürülən azərbaycanlının 1985-ci il təvəllüdlü Cəfərov Əşrəf Möhübbət oğlu olduğu deyilsə də, Cəfərovun qohumları bildirib ki, BQXK-nın nümayəndələri ilə görüşdə əsir özünü Səməndər Quliyev kimi təqdim edib. Cəfərovun qohumları əsirin ruhi xəstə olduğunu bildirirlər. BQXK-nin mətbuat xidməti də əsirin adını açıqlamayıb.
...