Azərbaycan, Bakı, 5 avqust /Trend/
Azərbaycanlı güləşçi Rövşən Bayramov London Yay Olimpiya Oyunlarında ilk görüşünü keçirib. 55 kq çəki dərəcəsində çıxış edən idmançımızın rəqibi rusiyalı Minqiyan Semenov olub.
Trend-in məlumatına görə, görüşün hər iki raundunu qələbə ilə bitirən Bayramov yarışın 1/8 finalına vəsiqə qazanıb.
1/8 finalda Bayranovun rəqibi ABŞ təmsilçisi Spenser Tomas Manqo olub. Görüşün birinci raundunda Bayramov 4 xallıq üstünlüyə yiyələnib. İkinci raundda da rəqibinə 4:0 hesabı ilə qalib gələn Bayramov olimpiadanın 1/4 finalında yer alıb.
Azərbaycanlı güləşçinin bu mərhələdəki rəqibi Çin təmsilçisi Li Şujin olub.
Görüşün hər iki hissəsini qələbə ilə bitirən Bayramov olimpiadanın yarımfinalına vəsiqə qazanıb.
Bayramovun növbəti rəqibi cənubi koreyalı Çoi Gücin olub. Rəqibindən üstün olan idmançımız finala yüksəlib.
Bayramov ölkəmizə gümüş medal qazandırıb. Güləşçimiz finalda iranlı rəqibinə məğlub olub.
Azərbaycanlı güləşçi Emin Əhmədov isə London Olimpiya Oyunlarında belaruslu rəqibini məğlub edərək bürünc medal qazandı. 74 kq çəki dərəcəsində çıxış edən idmançımızın ilk görüşdə rəqibi xorvatiyalı Neven Juqay idi.
Görüşü qələbə ilə bitirən Əhmədov yarışın 1/4 finalına vəsiqə qazanıb.
1/4 final görüşündə idmançımızın rəqibi gürcüstanlı Zurabi Datunaşvili idi. İlk raundda Datunaşvili üstün olub - 0:3. Lakin ikinci raundda Əhmədov vəziyyətdən çıxa bildi - 3:0. Həlledici 3-cü raundda isə Əhmədov 4:0 hesabı ilə qələbə qazandı və yarımfinala irəlilədi.
Təəssüf ki, Əhmədov yarımfinal görüşündə məğlub oldu və üçüncü yer uğrunda mübarizə apardı.