Azərbaycan, Bakı, 15 aprel /Trend/
İngiltərə Premyer Liqasının aparıcı klublarından biri olan "Mançester Siti" UEFA tərəfindən maliyyə "feyr pley"i qaydalarını pozduğuna görə ciddi şəkildə cəzalandırılacaq. Lakin onun Çempionlar Liqasından çıxarılacağı ehtimal olunmur. Trend-in məlumatına görə, xəbəri İngiltərənin "Teleqraf" qəzeti yayıb.
Əvvəlki kimi UEFA-nın müəyyən etdiyi maliyyə qaydalarına uyğun gəlmədiyinə görə şübhə altında olan təxminən 20 klub arasında "Mançester Siti" və "Pari Sen-Jermen" də var.
2011/12 və 2012/13-cü illər mövsümündə bahalı transferlərə xəsislik etməyən şeyx Mənsurun sahibi olduğu "şəhərlilərin" ziyanı 149 milyon funt olub.
UEFA-nı inandırmaq üçün "Siti"nin çərşənbə gününə qədər vaxtı var. Əks təqdirdə sanksiyalar qaçılmazdır. Ehtimal ki, ya ciddi cərimə olacaq, ya da futbolçuların transferinə qadağa qoyulacaq.
Bu gün İsveçrənin Nyon şəhərində UEFA-nın Maliyyə nəzarəti komitəsinin ikigünlük iclası keçiriləcək. İclasda qaydaları pozan klublar barəsində qurumun gələcək fəaliyyəti müzakirə olunacaq.