Bakı. Ənvər Məmmədov - Trend:
Bakıda keçirilən batut, ikili mini-batut və tamblinq üzrə Avropa çempionatı çox yüksək səviyyədə təşkil olunub.
Trend-in məlumatına görə, bunu rusiyalı gimnast Polina Troyanova deyib.
Bakıya ilk dəfə gəldiyini deyən gimnast qeyd edib ki, şəhər və yarışların yüksək səviyyəsi onun çox xoşuna gəlib.
P.Troyanova deyib ki, öz çıxışından çox razı qalmayıb:
“Çox da uğurlu olmayan çıxışıma baxmayaraq finala çıxa bildim. Ümid edirəm ki, orada daha uğurlu çıxış edəcəyəm. Bu, çox vacibdir”.
Qeyd edək ki, bu gün Bakıda batut gimnastikası, ikili mini-batut və tamblinq üzrə Avropa çempionatının birinci günü start götürüb.
Yarışların birinci günündə gənclər arasında batut, eləcə də böyüklər arasında ikili mini-batut və tamblinq üzrə yarışlar keçirilir.
Azərbaycanı birinci gün yarışlarda Selcan Maqsudova, Riyad Abbasov və Mixail Malkin təmsil edir.
Milli Gimnastika Arenasında baş tutacaq sayca 26-cı olan bu çempionatda həm böyüklər, həm də gənclər proqramında 25 ölkənin iştirakı və hər 3 növ üzrə idmançıların ümumi sayının 400-dən çox olacağı gözlənilir.
Gimnastlar üçün doğma məkana çevrilmiş arenada 4 gün davam edəcək turnir özündə 4 növ yarışları - fərdi batut, sinxron batut, tamblinq və ikili mini-batutu birləşdirəcək.
Avropa çempionatının əsas özəlliyi isə odur ki, gənc gimnastlar 2018-ci ildə baş tutacaq Gənclər arasında Olimpiya Oyunlarına, böyük gimnastlar isə 2019-cu ilin Avropa Oyunlarına lisenziyanı məhz Bakıda əldə edə biləcəklər.
Çempionat aprelin 15-ə kimi davam edəcək.