Bakı. Mətanət Nəsibova - Trend:
Ermənistanın işğalçı siyasəti Azərbaycana bütün sahələrdə, o cümlədən iqtisadi və ekoloji sahələrdə böyük ziyan vurur.
Bunu Trend-ə "AzerGold" QSC-nin İdarə Heyətinin sədri Zakir İbrahimov Bakıda keçirilən “İşğal olunmuş Azərbaycan ərazilərində qeyri-qanuni fəaliyyətlər və üçüncü tərəflərin məsuliyyəti” mövzusunda beynəlxalq konfrans çərçivəsində deyib.
O qeyd edib ki, Azərbaycanın işğal olunmuş ərazilərində qanunsuz fəaliyyətlə bağlı hesabat hazırlanıb və Azərbaycan Baş Prokurorluğuna göndərilib.
Onun sözlərinə görə, “AzerGold” tərəfindən başladılan Azərbaycanın işğal olunmuş ərazilərində əlvan metalların hasilatı ilə məşğul olan Ermənistan şirkətləri, fiziki və hüquqi şəxsləri, eləcə də xarici şirkətlərin məsuliyyətə cəlb edilməsi prosesi Baş Prokurorluq tərəfindən davam etdiriləcək:
“İşğal olunmuş ərazilərdə əlvan metallar on illərdir ki, hasil olunur. Ermənistan şirkətlərinin çoxmilyonluq gəlirləri qondarma “Dağlıq Qarabağ Respublikası”nda qeydiyyata alınıb. Bu, həm qondarma “DQR”, həm də Ermənistan büdcəsinə iri transfertlər etməyə imkan verir”.
O əlavə edib ki, işğal olunmuş ərazilərdən əlvan metalların satışından əldə edilən mənfəət hesabına Ermənistan büdcəsinə maliyyə vəsaitləri daxil olur:
“Təbii ki, bunun əsasında Ermənistanın işğalçı siyasəti, Azərbaycana qarşı təcavüzü dayanır”.
Qeyd edək ki, təbii ehtiyatlarla zəngin Azərbaycanın işğal olunmuş ərazilərində əlvan metal filizləri, qızıl, civə, mis, qurğuşun, daş kömür və sink, perlit və digər təbii resurslarla zəngin yataqlar da daxil olmaqla, 155-ə yaxın qiymətli daş, mineral və adi metal yatağı mövcuddur. Bunların sırasında Qızılbulaqdakı qızıl-mis-kolçedan yataqları, Dəmirli, Canyataq-Gülyataqdakı mis-qızıl və molibden yataqları (Tərtər rayonunun işğal olunmuş hissəsi), Söyüdlü, Ağdüzdağ, Tutxumdakı qızıl yataqları (Kəlbəcər), Vecnəlidəki qızıl yataqları (Zəngilan), Mehmana, Şorbulaqdakı qurğuşun yataqları (Kəlbəcər), Sarıbulaq, Ağyataq, Levçay, Şorbulaq, Qamışlı, Ağqaya (Kəlbəcər, Laçın), Çilgəzçay, Narzanlıdakı (Laçın) civə yataqlarını qeyd etmək olar.
Aparılmış araşdırmalarla Ermənistanda və digər ölkələrdə hüquqi qeydiyyatdan keçmiş “Vallex Group”, “Base Metals”, “ACP”, “Lerna metalurgiayi İnstitute”, “Teghout” və digər şirkətlərin rəhbərlərinin və fiziki şəxslərin Azərbaycanın işğal olunmuş ərazilərində təbii resursların qanunsuz istismarına cəlb olunduqları müəyyən olunub. Lixtenşteyndə qeydiyyatda olan və Ermənistanın "Vallex" Qrupunun tərkibinə daxil olan "Base Metals" şirkəti 2002-ci ildən etibarən Kəlbəcərin Heyvalı kəndi yaxınlığında Qızılbulaq mis-qızıl yatağını qanunsuz olaraq istismar edir. Vəhşicəsinə istismar nəticəsində yatağın resursları tükənib. 2007-ci ildən etibarən "GeoProMining" şirkətinə daxil olan "GPM Gold" şirkəti Kəlbəcər ərazisində Söyüdlü qızıl yatağını istismar edir. Peyk vasitəsilə çəkilmiş şəkillər yataqda işlərin genişləndirildiyindən xəbər verir. Kəlbəcər ərazisindən keçən Vardenis-Ağdərə yolunun çəkilişi Kəlbəcər rayonu daxil olmaqla, işğal olunmuş ərazilərdən təbii sərvətlərin Ermənistana və beynəlxalq bazarlara daşınmasına xidmət edir.
"AzerGold" tərəfindən təqdim olunan materiallar əsasında Baş Prokurorluq tərəfindən Azərbaycanın işğal olunmuş ərazilərində dağ-mədən resurslarının qanunsuz istismarına cəlb olunmuş hüquqi və fiziki şəxslərə münasibətdə cinayət işi açılıb. İsveçrə Konfederasiyasında qeydiyyatda olan "Frank Müller" şirkətinin rəhbəri və Azərbaycanın işğal olunmuş ərazilərində təbii resursların qanunsuz istismarına cəlb olunmuş Vartan Sirmakis barəsində də cinayət işi açılıb.