Bakı. Trend:
Böyük Britaniyanın paytaxtı Londonda 10-cu Beynəlxalq "One Young World” (Bir Gənc Dünya) sammiti keçirilib.
Sammitdə gender bərabərliyi, terrorla mübarizədə çıxış yollarının axtarışı, dünyada təhsilin inkişafı, ətraf mühitin qorunması və s. kimi qlobal mövzulara toxunulub.
190 ölkədən olan 2 min gənc lideri bir araya gətirən sammitin builki qonaqları Kanadanın baş naziri Castin Tryudo, BMT-inin keçmiş baş katibi Kofi Annan, baş yepiskop Desmond Tutu, ser Bob Geldof və Riçard Branson, Nobel sülh mükafatı laureatı Muhammad Yunus, BMT-nin xoşməramlı səfiri Emma Uotson, oskar mükafatçısı Djon Landau, İrlandiyanın keçmiş prezidenti Meri Robinson, şahzadə Megan Markl olublar.
Sammitdə ölkəmizi Bakı Ali Neft Məktəbinin tələbələri təmsil ediblər.
Ali Məktəbin Neft - Qaz mühəndisliyi ixtisasının IV kurs tələbələri Cahid Suleymanov və Coşqun Səmədov müxtəlif mövzular üzrə təşkil olunan diskusiyalarda iştirak ediblər. Onlar BP tərəfindən tələbələrin öz bacarıqlarını gələcəyin tələblərinə uyğunlaşdırmasına və daim dəyişməkdə olan dünyada uğur qazanmaları üçün lazımi bacarıqlara yiyələnməsinə dəstək məqsədi ilə keçirilən “Skills Refinery” (“Bacarıqların təkmilləşdirilməsi”) proqramının qalibləri kimi bu sammitdə iştirak hüququ qazanıblar. Tələbələr bildirib ki, bu cür qlobal sammitdə iştirak etmək Azərbaycan gənclərinin inkişafını nümayiş etdirmək üçün böyük imkandır.
Qeyd edək ki, “Bir Gənc Dünya”nın missiyası növbəti nəsil daha məsuliyyətli və effektiv rəhbərliyin formalaşdırılmasıdır. İllik sammit, qlobal və milli şirkətlərin, QHT-lərin, universitetlərin və digər qabaqcıl düşüncəli təşkilatların ən istedadlı gənc liderlərini bir araya gətirir.
Xatırladaq ki, "One Young World” təşəbbüsü 2009-cu ildə Devid Cones və Keyt Robertson tərəfindən yaradılıb. Öncəki illərdə sammit London, Sürix, Vaşinqton, Yoxansburq, Dublin, Bangkok, Ottava kimi şəhərlərdə keçirilib.