...

Mənəvi enerji mənbəyimiz Şuşa “Yaşıl enerji zonası”nın mərkəzinə çevrilir - Pərviz Şahbazov (FOTO)

İqtisadiyyat Materials 4 İyun 2022 15:02 (UTC +04:00)
Mənəvi enerji mənbəyimiz Şuşa “Yaşıl enerji zonası”nın mərkəzinə çevrilir - Pərviz Şahbazov (FOTO)

Bakı. Trend:

“Bakı Enerji Həftəsi” çərçivəsində Şuşada “Xalis sıfıra aparan yol: İşğaldan azad edilmiş ərazilərin yaşıl enerji potensialının inkişafı” mövzusunda xüsusi sessiya keçirilib. Tədbir Türkiyə Prezidenti Rəcəb Tayyib Ərdoğanın müraciətinin oxunması ilə başlayıb.

Energetika Nazirliyindən Trend-ə verilən məlumata görə, sessiyada açılış nitqi ilə çıxış edən energetika naziri Pərviz Şahbazov bu tədbirin “Şuşa ili”ndə Azərbaycanın mədəniyyət paytaxtı kimi yenidən dirçələn, öz inkişaf axarına qovuşan Şuşa şəhərində keçirilməsinin qürurverici olduğunu söyləyib.

Şuşa şəhərinin bütün tarixi-mənəvi dəyərləri ilə yanaşı artıq qələbəmizin də rəmzi olduğunu vurğulayan nazir deyib ki, Möhtərəm Prezidentimiz cənab İlham Əliyevin rəhbərliyi ilə Azərbaycan torpaqlarını cəmi 44 gün ərzində işğaldan azad etdiyi kimi bu əraziləri qısa müddətdə dirçəltmək əzmini də bütün dünyaya nümayiş etdirir.
Bildirilib ki, Qarabağ və Şərqi Zəngəzur iqtisadi rayonlarında aparılan genişmiqyaslı bərpa-quruculuq prosesi çərçivəsində 20 meqavatlıq elektrik stansiyaları istismara verilib. Bu il daha 5 stansiya istifadəyə veriləcək. Şuşa da daxil olmaqla bu ərazilərdə 19 yarımstansiya inşa və bərpa edilib, hazırda 7 yeni yarımstansiya tikilir, 8-nin də inşası planlaşdırılır. Strateji hədəflər isə daha böyükdür: “Azərbaycan bu ərazilərin yenidən qurulmasına enerji dayanıqlığı ilə bağlı müasir çağırışlar və qlobal iqlim dəyişikliyi probleminin həllinə dəstək müstəvisində yanaşır. Azərbaycan Prezidentinin Qarabağ və Şərqi Zəngəzuru xalis sıfır emissiyalı “Yaşıl enerji zonası” elan etməsi mütərəqqi inkişaf siyasətinin örnəyidir.”

Bu bölgənin “Yaşıl enerji zonası” Konsepsiyasının həyata keçirilməsi üçün ideal ərazilər olduğunu vurğulayan nazir Cəbrayılda 240 meqavatlıq günəş enerjisi üzrə bp ilə əməkdaşlıq edildiyini, qarşıdakı illərdə 83 MVt gücündə 18 kiçik su elektrik stansiyasının və 150 MVt damüstü günəş sistemlərinin də qurulmasına özəl və xarici investisiyanın cəlbinin nəzərdə tutulduğunu qeyd edib. Həmçinin 140 MVt gücündə “Xudafərin” və “Qız Qalası” su elektrik stansiyalarının istismara verilməsi, bütün bunlarla birgə yeni meqa layihələrin regionun “yaşıl” inkişafına töhfə verəcəyi vurğulanıb: "Tarix boyu mənəvi enerji mənbəyimiz olmuş Şuşa artıq “Yaşıl enerji zonası”nın mərkəzinə çevrilir. Bu gün 4 min meqavatlıq külək və günəş enerjisi layihələri üzrə əməkdaşlıq sənədinin imzalanması üçün məkan olaraq Şuşanın seçilməsi bunun daha bir təsdiqidir. Bu çoxmilyardlı investisiya təkliflərinin böyük bir qismi azad edilmiş ərazilərimizi əhatə edir. Bu, Azərbaycanın, bu bölgənin investorlar üçün cəlbediciliyinin nümayişi, enerji sistemimizə böyük töhfədir.”

Qeyd edək ki, sessiya SOCAR prezidenti vəzifəsini icra edən və birinci vitse-prezident Rövşən Nəcəf, bp-nin Azərbaycan, Gürcüstan və Türkiyə üzrə regional prezidenti Qəri Counz, “Masdar” şirkətinin nümayəndəsi Fauaz Al Muharrami, “ACWA Power” şirkətinin investisiya üzrə baş direktoru Klayv Turton, “Total Energies” şirkətinin Azərbaycan üzrə icraçı direktoru Regis Agutunun çıxışları ilə davam edib. Tədbir çərçivəsində Energetika Nazirliyi ilə “Masdar”, SOCAR ilə Masdar və bp arasında əməkdaşlıq sənədləri də imzalanıb.

Məqalədə:
Xəbər lenti

Xəbər lenti