Bakı. Trend:
2022-ci ildə Azərbaycanda 68 yeni dövlət standartı qəbul edilib.
Trend-in məlumatına görə, bu barədə bu gün İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli 2022-ci ilin yekunlarına həsr olunmuş mətbuat konfransında deyib.
O, 2021-ci ildə bütünlükdə 36 dövlət standartının qəbul edildiyini qeyd edib.
"2022-ci ildə verilən uyğunluq sertifikatlarının ümumi sayı 2065 olduğu halda, 2021-ci ildə 1733 uyğunluq sertifikatı verilib", - o deyib.
Abbasbəyli həmçinin Azərbaycan Standartlaşdırma İnstitutunun (AZSTAND) Türk Standartları İnstitutu ilə əməkdaşlıq çərçivəsində ölkə ərazisində Türkiyənin 9000-dən çox milli standartlarının rəsmi nəşrlərini yaymaq hüququ əldə etdiyini əlavə edib.
"AZSTAND-ın nəzdində fəaliyyət göstərən laboratoriyalarda 2022-ci il ərzində 2700-dən çox məhsul üzrə 12000-dən çox sınaq aparılıb", - M.Abbasbəyli bildirib.
Xatırladaq ki, 2022-ci ildə Azərbaycanda antinhisar məsələləri və haqsız rəqabət halları üzrə qaldırılan işlərin sayı 2021-ci illə müqayisədə üç dəfə, bağlanmış işlərin sayı isə 2,2 dəfə artıb. 2022-ci ildə bütünlükdə 48 işə baxılıb ki, 2021-i ildə bu göstərici 22, 2020-ci ildə isə 6 olub. 2022-ci ildə qaldırılan işlərin sayı 60, 2021-ci ildə 20, 2020-ci ildə isə 9 olub.