Bakı. Trend:
Orta Dəhliz böyük tranzit potensialına malikdir.
Trend-in məlumatına görə, bu barədə Ümumdünya Gömrük Təşkilatının baş katibi Kunio Mikuriya Transxəzər Beynəlxalq Şərq-Qərb Orta Dəhlizi boyu “Bir pəncərə” prinsipindən istifadə etməklə tranzit gömrük prosedurunun sadələşdirilməsi layihəsi üzrə Bakıda keçirilən çoxtərəfli görüşdə deyib.
Onun sözlərinə görə, bu dəhliz ölkələrin iqtisadiyyatlarının inkişafını dəstəkləmək və əməkdaşlığı tənzimləmək üçün yaxşı layihədir.
"Sənəd dövriyyəsinin rəqəmsal mühitə keçirilməsi əməkdaşlığımızın ayrılmaz tərkib hissəsini təşkil edir və mən ötən il Avropa İttifaqının (Aİ) böyük tədbirlərinin birində bu məsələni qaldırmışam. Aİ və təşkilat nümayəndələri dəstəklərini ifadə etdilər. Biz Orta Dəhlizin inkişaf proseslərinə AYİB və ÜTT vasitələrini cəlb etməyi planlaşdırırıq", - o deyib.
Mikuriya həmçinin ÜTT-nin yaxın üç il ərzində gömrük orqanları və yükdaşıyanlar arasında şəxsi kontaktların azaldılması məsələsini gözdən keçirəcəyini bildirib
"Blokçeyn texnologiyasından istifadə bu fəaliyyətin rəqəmsallaşdırılmasını sürətləndirəcək və biz həmçinin rəqəmsallaşdırma prosedurlarına bu texnologiyaların tətbiqini nəzərdən keçirəcəyik", - o deyib.