Bakı.Trend:
Belarus Universal Əmtəə Birjası (BUƏB) və süni intellekt texnologiyaları əsasında avtomatlaşdırma sistemlərinin azərbaycanlı tərtibatçısı "Aigen Solutions MMC" qarşılıqlı anlaşma memorandumu imzalayıb
Trend bu barədə BUƏB-ə istinadən xəbər verir.
Sənədə BUƏB tərəfindən idarə heyəti sədrinin birinci müavini Olqa Qorelik, "Aigen Solutions" tərəfindən isə şirkətin direktoru İsmayıl Məmmədli imza atıb. Mərasim Azərbaycan Respublikasının İxracın və İnvestisiyaların Təşviqi Agentliyinin (AZPROMO) dəstəyi ilə təşkil olunan Azərbaycan işgüzar dairələrinin BUƏB-ə səfəri çərçivəsində baş tutub.
Memoranduma əsasən, tərəflər birja ticarətinin təşkili və həyata keçirilməsi ilə bağlı biznes proseslərin optimallaşdırılması və səmərəliliyinin artırılması üçün süni intellekt texnologiyalarının tətbiqi sahəsində əməkdaşlığın inkişaf etdirilməsini planlaşdırırlar. Bu əməkdaşlığın əsas istiqamətlərindən biri süni intellekt həllərinin BUƏB-in infrastrukturuna və əməliyyat fəaliyyətinə inteqrasiyası olacaq ki, bu da böyük həcmli məlumatların təhlilinin avtomatlaşdırılmasına, bazar tendensiyalarının proqnozlaşdırılmasına və risklərin idarə edilməsinə imkan verəcək. Bundan əlavə, BUƏB və "Aigen Solutions" ticarət sahəsində rəqəmsal texnologiyaların tətbiqi üzrə mütəmadi məsləhətləşmələr və təcrübə mübadiləsi aparmağı, eləcə də birja fəaliyyətinin real şəraitində süni intellekt həllərinin sınaqdan keçirilməsinə yönəlmiş birgə layihələr həyata keçirməyi nəzərdə tuturlar.
“Süni intellekt sistemlərinin tətbiqi texnoloji trendə uyğunlaşma deyil, müasir birja üçün obyektiv zərurətdir. Bu cür həllər bazar məlumatlarının təhlilinin dəqiqliyini artırmağa, ticarət proseslərini optimallaşdırmağa və əməliyyat risklərini minimuma endirməyə imkan verir. Bundan əlavə, rutin əməliyyatların avtomatlaşdırılması vaxt və resurslara qənaət edərək strateji inkişaf və ticarət iştirakçılarına keyfiyyətli xidmət göstərilməsinə fokuslanmağa şərait yaradır”, – deyə Olqa Qorelik vurğulayıb.
“BUƏB ilə tərəfdaşlıq sayəsində biz qabaqcıl süni intellekt texnologiyalarını birja ticarətinin real vəzifələrinə uyğunlaşdırmaq imkanı əldə edəcəyik. Əminəm ki, birgə fəaliyyətimizin nəticəsi həm birja, həm də onun dünya üzrə müştəriləri üçün praktik fayda verəcək çevik və genişlənə bilən rəqəmsal həllər olacaq”, – deyə İsmayıl Məmmədli bildirib.
Hazırda BUƏB-də Azərbaycan Respublikasının 218 rezidenti akkreditasiyadan keçib. 2026-cı ilin ilk 5 ayının nəticələrinə görə, Belarus və Azərbaycan arasında birja əmtəə dövriyyəsi 15% artaraq 48 milyon dollara çatıb.
