Startap və texnologiyalar parkı rezidentləri üçün yeni vergi və gömrük güzəştləri nəzərdə tutulur

İqtisadiyyat Xəbər 1 Sentyabr 2026 10:53 (UTC +04:00)
Startap və texnologiyalar parkı rezidentləri üçün yeni vergi və gömrük güzəştləri nəzərdə tutulur
Sadiq Cavadov
Sadiq Cavadov
İqtisadi jurnalist Bütün xəbərlər

Bakı. Trend:

Azərbaycanda startaplar və Texnologiyalar Parkının rezidentləri üçün vergi, gömrük və digər sahələrdə yeni güzəştlərin tətbiqi nəzərdə tutulur.

Trend-in tədbirdəki müxbirinin məlumatına görə, bunu İnnovasiya və Rəqəmsal İnkişaf Agentliyinin (İRİA) Hüquqi təminat şöbəsinin müdiri Səbinə Hümbətzadə “Media üçün rəqəmsal səriştələr” adlı maarifləndirici sessiya çərçivəsində təşkil olunan “Azərbaycanda rəqəmsal və innovasiya ekosisteminin inkişafı: yeni qanunvericilik imkanları” mövzusunda çıxışı zamanı deyib.

Onun sözlərinə görə, yeni qanunvericilik paketi startapların və texnologiyalar parkının rezidentlərinin fəaliyyətinin stimullaşdırılmasına, onların maliyyə və resurslara çıxışının genişləndirilməsinə yönəlib.

“Yeni yanaşma çərçivəsində müəyyən edilmiş sahələrdə fəaliyyət göstərən fiziki və hüquqi şəxslər üçün vergi, əmlak, torpaq və digər istiqamətlərdə müxtəlif güzəştlər nəzərdə tutulur”, - deyə S.Hümbətzadə bildirib.

O qeyd edib ki, startap və texnologiyalar parkının rezidentlərinin üzləşdiyi inzibati və maliyyə yükünün azaldılması məqsədilə vergi yoxlamaları, vergi borcları, elmi-tədqiqat və innovasiya fəaliyyəti ilə bağlı da dəyişikliklər hazırlanıb.

“Bu dəyişikliklərin əsas məqsədi startapların və innovasiya ekosisteminin inkişafına mane olan mövcud çətinliklərin aradan qaldırılması, onların fəaliyyətinin daha əlverişli hüquqi və iqtisadi mühitdə həyata keçirilməsinin təmin edilməsidir”, - deyə şöbə müdiri vurğulayıb.

S.Hümbətzadə bildirib ki, texnologiya transferi, proqram təminatı, bulud xidmətləri, idxal və kadr hazırlığı kimi istiqamətlər üzrə də güzəştlərin tətbiqi nəzərdə tutulur.

O əlavə edib ki, qanunvericilik paketində rəqəmsal iqtisadiyyatın inkişafına uyğun olaraq yeni anlayış və mexanizmlərin formalaşdırılması da nəzərdə tutulub.

“Qanunvericilikdə "rəqəmsal səyyah" və "frilanser" kimi yeni anlayışların təsbit olunması rəqəmsal iqtisadiyyatın müasir tələblərə uyğun inkişafına xidmət edəcək”, - deyə S.Hümbətzadə qeyd edib.

Onun sözlərinə görə, bütün bu dəyişikliklər Azərbaycanda innovasiya və startap ekosisteminin inkişafını sürətləndirməyə, yeni bizneslərin yaranmasını və mövcud subyektlərin fəaliyyətinin genişlənməsini dəstəkləməyə hesablanıb.

Məqalədə:

Xəbər lenti

Xəbər lenti