Bakı. Trend:
Almaniya G20 ölkələri arasında elektrik enerjisinin ən yüksək qiymətə satıldığı ölkədir.
Aparılan təhlilərə əsasən, Almaniyada 1 kilovatsaat elektrik enerjisinin qiyməti 35,6 sent təşkil edir. Siyahıda İtaliya 34,5 sentlə ikinci, Böyük Britaniya isə 32,4 sentlə üçüncü yerdə qərarlaşıb. G20 ölkələri üzrə orta qiymət 16,3 sentdir. Beləliklə, Almaniyada elektrik enerjisi orta göstəricidən iki dəfədən çox bahadır. Fransada bu göstərici 23,3, ABŞ-da isə 18,3 sent təşkil edir.
Təhlili aparan “Verivox” müqayisə portalı yüksək qiymətlərin əsas səbəblərindən birinin vergilər, rüsumlar və şəbəkə haqlarının yükünün çox olması ilə əsaslandırıb. Məlumata görə, Almaniyada elektrik enerjisinin qiymətinin 60 faizindən çoxunu məhz bu ödənişlər təşkil edir.
İqtisadi birliklər və siyasətçilər isə hökumətin elektrik vergisinin azaldılması istiqamətində tədbirlər görməsinin vacibliyini bildirirlər.
