Bakı. Trend:
Fransa bu həftə ərzində Qəzzadan ümumilikdə 44 fələstinlini təxliyə edib, onların arasında təhdid altında olan alim və sənətçilər, eləcə də təcili qəbul proqramının qalibləri var.
Bu barədə AFP cümə günü Fransanın diplomatik mənbəsinə istinadən məlumat yayıb.
“Avqustun 24-də həyata keçirilən əməliyyat çərçivəsində Fransa Qəzzadan 44 nəfəri – Fransa hökumətinin təqaüdçülərini, eləcə də "PAUSE" proqramının qaliblərini təxliyə edib”, – deyə həmin mənbə bildirib.
Mənbə əlavə edib ki, Fransa “münaqişənin əvvəlindən etibarən son dərəcə mürəkkəb təxliyə əməliyyatları vasitəsilə öz vətəndaşlarımızı və onların ailələrini, Qəzzadakı Fransa İnstitutunun əməkdaşlarını, eləcə də mükəmməllik proqramlarının qaliblərini təhlükəsiz yerə çıxarmaq üçün səfərbər olub”.
2017-ci ildən etibarən nüfuzlu təhsil və tədqiqat müəssisəsi olan Fransa Kollecinin yaratdığı "PAUSE" proqramı dünyanın müxtəlif yerlərində təhdid altında olan alim və sənətçilərin təcili şəkildə qəbul edilməsinə dəstək verir.
Yanvar ayında Fransanın xarici işlər naziri Jan-Noel Barro logistika səbəblərinə görə Fransanın Qəzza sakinlərinin "PAUSE" proqramına müraciətlərinin qəbulunu dayandırdığını təsdiqləmişdi. O, həmin vaxt bildirmişdi ki, “PAUSE proqramının 50 fələstinli qalibi və onların ailə üzvləri” HƏMAS-ın 2023-cü il oktyabrın 7-də İsrailə hücumundan və Qəzzada müharibənin başlamasından sonra Fransaya köçürülüb.
İyulun əvvəlində təxminən 20 fələstinli və bir neçə assosiasiya Fransanın ən yüksək inzibati məhkəməsi olan Dövlət Şurasına müraciət edərək, Fransa hökumətinin və administrasiyasının Qəzzada yaşayan namizədlərin müraciətlərinə baxılmasını bərpa etməsini və viza müraciətlərinə yenidən baxmasını tələb edib.
Müraciət edənlərin vəkillərindən biri olan Lin Hayqar AFP-yə bildirib ki, Dövlət Şurası bu müraciətlə bağlı hələ qərar qəbul etməyib. Onun sözlərinə görə, hazırda Qəzzada "PAUSE" proqramının daha 73 qalibi qalır.
