Azərbaycan, Bakı / Trend , müxbir S.Babayeva/ Rusiya Mərkəzi Bankının verdiyi məlumata görə, ilin birinci rübündə pul köçürmələri sistemi və Rusiya Federasiyasının poçtu vasitəsilə həyata keçirilən transsərhəd köçürmələrində Azərbaycanın payı 147 mln. dollar təşkil edib.
Azərbaycandan Rusiyaya pul köçürmələri 8 mln. dollar, Rusiyadan Azərbaycana isə 139 mln. dollara təşkil edib. Beləliklə, 132 mln. dollar həcmində müsbət saldo yaranıb.
Gürcüstanın RF ilə pul köçürmələrinin məbləği 137 mln. dollar təşkil edib, mənfi saldo isə 121 mln. dollar təşkil edib.
MDB ölkələri arasında ən yüksək göstərici Özbəkistanla olan göstəricilərdir ki, bu ölkədən Rusiyaya 44 mln., Rusiyadan Özbəkistana isə 326 mln. dollar pul köçürülüb. Özbəkitstanın ümumi dövriyyədə payı 369 mln. dollara çatıb.
Özbəkistandan sonra siyahıda Tacikistan ( pul köçürmələrində payı 341 mln. dollar), Ukrayna (339 mln. dollar), Ermənistan (225 mln. dollar), Moldova (184 mln. dollar), Qırğızıstan (171 mln. dollar), Qazaxıstan (78 mln. dollar), Belarus (23 mln. dollar) və Türkmənistan (7 mln. dollar) dayanır.
Ümumilikdə Rusiyanın MDB ölkələri ilə pul köçürmələri 2021 mln. dollar təşkil edib.
