Azərbaycan, Bakı/ Trend , müxbir İ.Xəlilova/ 2007-ci ilin yanvar-iyun aylarında ölkə iqtisadiyyatında istifadə olunmuş xarici kapitalın ümumi həcmi 3.5 mlrd. dollar təşkil edərək əvvəlki ilin müvafiq dövr göstəricisindən 54.1% çox olub. Bu barədə Azərbaycan Milli Bankından məlumat verilib. Bu göstəricinin əvvəlki ilin müvafiq dövrünə nisbətən nəzərəçarpacaq dərəcədə artmasının əsas səbəbi dövlət təminatı olmayan xarici kreditlərin cəlb olunması ilə bağlıdır.
Hesabat dövrü ərzində ölkədən kapital axınının strukturunda da mühüm kəmiyyət və keyfiyyət dəyişiklikləri baş verib. Belə ki, əvvəlki dövrlərdə ölkə iqtisadiyyatında istifadə olunmuş birbaşa investisiyaların repatriasiyası və xarici iqtisadiyyata yönəldilmiş birbaşa investisiyaların ümumi məbləği 2006-cı ilin müvafiq dövr göstəricisindən 1.8 dəfə çox olaraq 4.4 mlrd. dollara çatıb. Bu artım əsas etibarilə "Əsrin müqaviləsi" ilə bağlı neft-qaz sektorunun xarici öhdəliklərinin azalması hesabına xarici ölkələrin iri neft şirkətləri tərəfindən Azərbaycana yönəldilmiş birbaşa investisiyaların repatriasiyasının həcminin artması ilə bağlıdır.
Belə ki, 2006-ci ilin yanvar-iyun aylarında neft-qaz sektoru üzrə repatriasiya olunmuş investisiyaların həcmi 1.9 mlrd. dollar məbləğində olduğu halda, 2007-ci ilin yanvar-iyun aylarında bu göstərici 2 dəfə artaraq 4 mlrd. dollara çatıb.
Birbaşa investisiyalar formasında ölkə iqtisadiyyatında istifadə olunmuş daxilolmalar 2 mlrd. dollar təşkil edib. Bu investisiyaların strukturunda neft-qaz sektorunun xüsusi çəkisi əvvəlki ilin müvafiq dövrü ilə müqayisədə 7.4% artaraq 91.5% təşkil edib.
Bu sərmayələr iri neft-qaz layihələrinin, BP Exploration (Şah Dəniz) Ltd. və Cənub Qafqaz Kəməri Şirkətinin (Bakı-Tbilisi-Ərzurum qaz kəmərinin) tikintisi layihəsi və Azərbaycan Beynəlxalq Əməliyyat Şirkətinin "Azəri-Çıraq-Günəşli" yatağında görülən işlərin maliyyələşdirilməsi ilə əlaqədar ölkə iqtisadiyyatında istifadə olunub.
İqtisadiyyatın müxtəlif sahələrinə birbaşa investisiyalar şəklində yönəldilmiş xarici kapital 168.1 mln. $ təşkil edib. Bu isə birbaşa xarici investisiyaların həcminin 8.5%-nə bərabərdir.
