Azərbaycan, Bakı/ Trend müxbir İ.Xəlilova/ Asiya İnkişaf Bankı (AİB) bu həftə Masallı-Astara avtomagistralının bir hissəsinin rekonstruksiyası ilə bağlı kredit razılaşması layihəsini Azərbaycan hökumətinə təqdim etməyə hazırlaşır. Dəyəri 200 mln. dollar olan layihə AİB Direktorlar Şurası tərəfindən sentyabrın 28-də təsdiqlənib. Bu barədə məlumatı bazar ertəsi Bankın Bakı nümayəndəliyindən veriblər.
Multitranche Financing Facility (MFF) mexanizmi çərçivəsində Masallı-Astara avtomobil yolu üçün təqdim olunan 500 mln. dollar dəyərində kredit üç yol layihəsinin maliyyələşdirilməsi üçün nəzərdə tutulub. İndiyə qədər hələ ki, bir layihə razılaşdırılıb, MFF çərçivəsində digər vəsaitlərin istifadəsi üçün isə Bank 2014-cü ilə qədər vaxt verib.
Danışıqlar prosesindəki gecikmə ilə əlaqədar Masallı-Astara layihəsi üzrə birinci yol layihəsi üçün kredit sazişinin imzalanması prosedurunun sürətləndirilməsi nəzərdə tutulur ki, bu da noyabr ayının əvvəlində baş verməlidir.
Razılaşmaya görə, Asiya Bankının resursları hissə-hissə ayrılacaq. Bankın adi resurslarından 190 mln. dollar (4 il ödəmə möhləti ilə libor+0,6 faiz dərəcəsi ilə 24 il), 10 mln. dollar isə güzəştlə (8 il ödəmə möhləti ilə bu dövr üçün 1 faiz, qlana dövr üçün 1,5 faizlə 32 il) ayrılacaq. Kreditin güzəştli hissəsi avtomagistrala birləşən ikinci dərəcəli kənd yollarının yenidənqurulması üçün nəzərdə tutulub.