Azərbaycan, Bakı / Trend müxbir Ü.İsmayılova/ Tikinti avadanlığının istehsalı ilə məşğul olan iri Belçika şirkətləri Azərbaycanın tikinti sektorunda çalışan azərbaycanlı iş adamları ilə əməkdaşlıq etməkdə maraqlıdırlar. Bu barədə çərşənbə günü Azərbaycan-Belçika biznes- forumunda Azərbaycan Milli Sahibkarlar Konfederasiyasının rəhbəri Ələkbər Məmmədov məlumat verib.
"Azərbaycan və Belçika arasında xarici ticarət dövriyyəsinin xeyli artmasına baxmayaraq, bu Azərbaycan tərəfini qane etmir" - deyə Məmmədov bildirib.
Məmmədovun sözlərinə görə, biznes-forum iki ölkə arasında xarici ticarət dövriyyəsinin artmasına səbəb olacaq. Xarici ticarət dövriyyəsi 2001-ci ildə 17 mln. dollar, 2006-cı ildə 20,9 mln. dollar təşkil edib. Azərbaycan və Belçika arasında ticarət dövriyyəsi yanvar-avqust ayları ərzində 21,1 mln. dollar təşkil edib.
Məmmədov bildirib ki, biznes-forumda üç iri Belçika şirkəti iştirak edəcək. Bunlar tikinti işlərinin proqram təminatı ilə məşğul olan "Bocad", daşların kəsilməsi üçün almaz başlıqlar istehsal edən
"Diamant Boart-Husqvarna Belgium SA", dam örtüklərinin istehsalı ilə məşğul olan "Coversys"
şirkətləridir.
Azərbaycan tərəfi biznes-forumda 25 yerli tikinti şirkəti ilə təmsil olunur.
