Azərbaycan, Bakı / Trend müxbir Ü.İsmayılova/ Avropa Komissiyasının TACİS proqramı Azərbaycanın qeyri-neft sektorunun inkişafına yardım etmək niyyətindədir. Bu barədə çərşənbə axşamı Bakıda "Regional inkişaf, siyasət və planlaşdırma" proqramının təqdimat mərasimində proqramın rəhbəri Qyunter Ekkel məlumat verib.
Dəyəri 3,5 mln. avro olan layihə 30 aylıq bir müddət üçün nəzərdə tutulub. Proqrama iki pilot rayon, Şəki (Şəki-Zaqatala) və Mingəçevir daxildir.
Avropa İttifaqının Azərbaycana texniki yardım proqramı çərçivəsində İqtisadi İnkişaf Nazirliyinin regional şöbələrinin gücləndirilməsi, təlimlərin keçirilməsi, şöbələrin gələcək inkişafı məqsədilə qabaqcıl kənd təsərrüfatı və qeyri-kənd təsərrüfatı müəssisələrinin seçilməsi nəzərdə tutulur.
Azərbaycanda regional inkişafa yardım proqramının məsləhətçiləri GDSİ, "Ecorys" (Hollandiya), "Dominus" (İspaniya) şirkətləridir.
Ekkelin sözlərinə görə, proqram üç əsas istiqamti əhatə edir:
- kiçik və orta sahibkarlığın inkişafı
- kənd təsərrüfatının inkişafı
- aqro və bank kreditlərinin genişləndirilməsi
Azərbaycan iqtisadi inkişaf nazirinin müavini Niyazi Səfərovun təqdimat mərasimi zamanı verdiyi məlumata görə, proqram regionların 2004-2008-ci illəri əhatə edən sosial-iqtisadi inkişafı üzrə dövlət proqramı çərçivəsində həyata keçirilir.
"Bu proqramın uğurlu inkişafı nəzərə alınaraq müddəti uzadıla bilər" - deyə Səfərov bildirib.
