Azərbaycan, Bakı / Trend müxbir S.Babayeva/ Almaniyanın İstehlakçıların Müdafəsi, Ərzaq və Kənd Təsərrüfatı Nazirliyinin nümayəndəsi Rudiqer Ostun cümə günü verdiyi məlumata görə, Azərbaycan ilk dəfə olaraq Beynəlxalq Yaşıl Həftə-Berlin 2008 qida sənayesi, kənd təsərrüfatı, bağçılıq sərgisində milli stendlə çıxış edəcək. Sərgi yanvarın 18-27-də Almaniyada keçiriləcək.
Rudiqerin sözlərinə görə, Azərbaycan sərgi iştirakçılarına öz ərzaq məhsullarını təqdim edəcək.
82 il əvvəl keçirilməyə başlayan Yaşıl Həftə sərgisi 2008-ci ildə 73-cü dəfə keçiriləcək. 1926-cı ildən 116 dövlətdən 73 mindən çox nümayəndə bu sərgidə öz ərzaq, kənd təsərrüfatı və bağçılıq məhsullarını təqdim edib, 30 milyondan çox pərakəndə və topdansatış ticarətlə məşğul olan şəxslər və adi siravi şəxslər sərgiyə tamaşa ediblər.
Beynəlxalq Yaşıl Həftə-Berlin 2008 sərgisinin təşkilatçısı "Messe Berlin GmbH"dir. Sərginin qeyri-kommersiya sponsorları Almaniya Fermerlər Assosiasiyası (Deutscher Bauernverband, DBV) və Almaniya Qida Sənayesi Təşkilatıdır (Bundesvereinigung der Deutschen Ernahrungsindustrie, BVE).
Yaşıl Həftədə geniş çeşiddə məhsullar təqdim olunur:
- Ərzaq məhsulları və bəzək əşyaları
- Təzə məhsullar
- Pivə, araq və digər spirtli içkilər
- Ət və kolbasa məhsulları
- Dəniz məhsulları
- Çaylar, otlar və ədviyyat
- Kənd təsərrüfatı və bağçılıq avadanlıqları
- Toxumlar
- Oranjereya, istixanalar və bağçılıq alətləri
- Damazlıq mal-qara
- Mətbəx ləvazimatları və məişət texnikası
Ötən sərgidə Almaniyanın kansleri Angela Merkel və Avropa Komissiyasının nümayəndəsi Xose Manuel Barrosa da daxil olmaqla Almaniya və başqa ölkələrin 400-dən çox aparıcı siyasətçiləri iştirak edib. Azərbaycanı sərgidə kənd təsərrüfatı naziri İsmət Abbasov təmsil edib və nazir Azərbaycanın ÜTT-yə daxil olması prosesinin davamı kimi Almaniya Federativ Respublikası ilə Azərbaycanda sanitar və fitosanitar nəzarət sisteminin təkmilləşdirilməsinə dair birgə bəyannamə imzalayıb. Nazir sərgi çərçivəsində keçirilən "Kənd təsərrüfatı və bioenergetika" "Şərq-Qərb" Aqroforumunda da iştirak edib.
2008-ci ildə sərgi çərçivəsində kənd təsərrüafatı nazirlərinin beynəlxalq konfransı, kənd təsərrüfatı üzrə beynəlxalq forum və s. tədbirlər keçiriləcək.
