Azərbaycan, Bakı/ Trend İ.Xəlilova/ Alman sığorta şirkəti "Munxen Re" "Azersigorta" Dövlət Kommersiya Sığorta Şirkətində iştirak payı əldə etməkdə maraqlı olduğunu bildirib. Bu barədə Azərbaycan şirkətinin sədri Məmməd Məmmədov məlumat verib. "Azersigorta 100 faiz dövlət şirkəti olduğu üçün biz xarici səmdarın cəlb edilməsi planlarını ilk növbədə hökumətlə razılaşdırmalıyıq. "Munxen Re" ilə danışıqlar artıq üç aydır ki, aparılır", Məmmədov bildirib. Onun rəyinə görə, şirkətin dövlət mülkiyyətindən çıxarılması prezidentin sərəncamı əsasında baş verə bilər. Məmmədov "Munxen Re"nin dünya şöhrətini nəzərə alaraq hesab edir ki, onun səhmdarlığa cəlb edilməsi "Azersigorta"nın sığorta bazarındakı mövqelərini möhkəmlədə bilər. Maliyyə Nazirliyinin Sığorta Nəzarəti şöbəsinin rəhbəri Namiq Xəlilov nazirliyə bu barədə müraciətin daxil olmadığını bildirib. "Azersigorta" 9 ayın nəticələri üzrə gəlirlərin həcminə görə artıq liderdir. Bu dövr ərzində şirkət 13.94 mln. manat sığorta pulu yığıb. Ödənişlərin məbləği 6.34 mln. manatdır. Şirkət rəhbərinin sözlərinə görə, özəlləşdirmə qərarınadək "Azersigorta" şirkətin kapitallaşdırılmasını davam etdirəcək. 2008-ci ilin iyulunadək şirkətin nizamnamə kapitalının 3 mln. manatdan 5 mln. manatadək artırılması planlaşdırılır. Yenidən kapitallaşdırma ənənəvi olaraq şirkətin toplanmış gəlirləri hesabına aparılır.
...