Azərbaycan, Naxçıvan/ Trend , müxbir E.Məmmədov/ 2007-ci il ərzində Naxçıvan Muxtar Respublikasında kredit qoyuluşu 7 milyon manat artmışdır. Trend in müxbirinin verdiyi məlumata görə, bu fikirlər Milli Bankın Naxçıvan MR İdarəsində keçirilən iclasda səslənib.
İdarənin sədri Səbuhi Məmmədov qeyd edib ki, ötən il Naxçıvan MR-ın iqtisadiyyatına yönəldilən kredit qoyuluşu 18 milyon 385 min manat, o cümlədən uzunmüddətli kredit qoyuluşu 17 mln. 488 min manat, qısamüddətli kredit qoyuluşu isə 897 min manat təşkil etmişdir. Keçən ilin müvafiq dövrü ilə müqayisədə kredit qoyuluşu 7 mln. manat artmış və ya 170 faiz təşkil etmişdir.
Həmçinin 2007-ci ildə bank və qeyri-bank kredit təşkilatları tərəfindən 13 mln. 803 min manat kredit verilmişdir ki, bunun da 6 mln. 209 min manatı qısamüddətli, 7 mln. 594 min manatı isə uzunmüddətli kredit təşkil edir.
2007- ci ildə banklar tərəfindən 230 hüquqi, 413 fiziki şəxs olmaqla 643 müştəriyə yeni bank hesabı açılmışdır. Açılmış bank hesablarının 491-i fəaliyyət göstərir ki, onlardan 120-i hüquqi, 371-i isə fiziki şəxsdir.
Ötən il ərzində xarici ölkələrə mal və avadınlıqların dəyərinin ödənilməsi üçün 2 mln. 647 min AVRO, 35 mln. 910 min ABŞ dolları, 3 mln. 970 min rus rublu köçürülmüşdür.
Idarə sədri onu da qeyd etmişdir ki, 2007-ci ildə Naxçıvan MR-də mövcud olan bankomatların sayı 48-dən 51-ə çatdırılıb ki, onların da 33-ü Naxçıvan şəhərindədir.
O da vurğulanıb ki, muxtar respublika üzrə əməkhaqqı, pensiya və fərdi plastik kart alanların sayı 2006-cı ildə 29 min nəfər təşkil edirdisə, hazırda plastik kart alanların ümumi sayı 65 min 280 nəfərə çatmış və ya ötən ilin müvafiq dövrü ilə müqayisədə 36 min 280 ədəd artmışdır. Bu ilin yarısına kimi vətəndaşların, xüsusilə kənd yerlərində əməkhaqqı, pensiya və müavinətlərin tamamilə plastik kartlarla bankomatlar vasitəsilə ödənilməsi başa çatdırılacaqdır.
İclasda o da bildirilib ki, 2007-ci ildə təcili pul köçürmələri vasitəsilə dünyanını 40-dan çox ölkəsindən muxtar respublika vətəndaşlarının adına 5 milyon 967 min ABŞ dolları məbləğində pul köçürülmüş və banklar vasitəsilə ödənilmişdir.