Azərbaycan, Bakı, 01 fevral/ " müxbir Ü.İsmayılova/ Azərbaycanın iri sığorta şirkətlərindən biri AzSigorta ölkə regionlarında fiziki şəxslər üçün güzəştli sığorta tətbiq etmək niyyətindədir. Bu barədə cümə günü şirkətin baş direktorunun müavini Xəyal Məmmədxanlı məlumat verib.
Onun sözlərinə görə, ölkə regionları üçün xüsusi sığorta paketləri hazırlanır və bu paketlərdə tariflər fiziki şəxsin aylıq gəlirinə görə qoyulacaq.
Məmmədxanlı şirkətin yeni regional filial və ofislərinin xüsusi qiymətlərlə və əsasən, hüquqi şəxslərə sığorta paketləri (əmlakın və avtomobilin sığortası) təqdim etdiyini bildirib.
2006-cı ilin noyabrından fəaliyyət göstərən Az Sigorta SŞ, üçü məcburi olmaqla, ümumilikdə 28 növ sığorta xidməti göstərir. 2007-ci ilin yekunlarına görə, şirkət ilk dəfə olaraq, yığımların həcminə görə Azərbaycan sığorta şirkətləri liderlərinin onluğuna daxil olub. Yığımlar 5 mln. manat təşkil edib.
