Azərbaycan, Bakı, 11 fevral / Trend , müxbir İ.Xəlilova, A.İsmayılova / Azərbaycan hökuməti 2008-ci ildə məcburi köçkünlərin ərzaq xərclərini artırmaq niyyətindədir,- bazar ertəsi Baş nazirin müavini, Qaçqın və Məcburi Köçkünlərlə İş üzrə Dövlət Komitəsinin sədri Əli Həsənov deyib. Hazırda hər nəfərə maddi yardımın məbləği doqquz manat təşkil edir.
"Baxmayaraq ki, bu məbləğ azdır, bu məqsədlə ayrılan ümumi vəsait çoxdur", - Həsənov hesab edir.
Ötən il məcburi köçkünlərin qida xərclərinin maliyyələşməsi üçün dövlət büdcəsindən 67 mln. manat ayrılıb. Baş nazir müavininin sözlərinə görə, hazırda bu ilin xərcləri dəqiqləşdirilir.
Hazırda rayon və şəhərlərdə yaşayan qaçqınlar arasında ayrı-seçkiliyi aradan qaldırmaq məqsədilə araşdırmalar aparılır, çünki indi ərzaq üçün maddi yardım, əsasən, rayon yerlərində cəmləşənlərə verilir. Lakin, son zamanlar rayonlarda yaşayan məcburi köçkünlərin həyat səviyyəsi, şəhərdəkilərə yaxınlaşıb. Bununla əlaqədar hökumət bu məsələdə balansın təmin edilməsi yollarını axtarır.
Hazırda Azərbaycanda 800 mindən artıq məcburi köçkün var.
2001-ci ildən bu günədək, qaçqın və məcburi köçkünlərin sosial-məişət problemlərinin həlli üçün Azərbaycanın Dövlət Neft Fondundan $352,4 mln. ayrılıb.
Müəlliflə əlaqə saxlamaq üçün elektron ünvan - [email protected]
