Azərbaycan, Bakı, 18 mart/ " müxbir İ.Xəlilova/ Azərbaycanın Milli Bankı (AMB) qlobal kastodianın seçilməsi üçün açıq tender elan edib. Tender təklifləri olan zərflərin açılması iddiaçıların istəyi əsasında, qanuni təmsilçi və ya vəkalətli nümayəndələrinin iştirakı ilə, 22 may 2008-ci ildə yerli vaxtla saat 11:00-da Azərbaycan Respublikası Milli Bankının inzibati binasında keçiriləcək. İddiaçılar öz təkliflərini 21 may 2008-ci il saat 15:00-dan gec olmayaraq, R.Behbudov küç., 32, Bakı AZ1014 ünvanına təqdim etməlidir.Tenderdə kastodian xidməti sahəsində ixtisaslaşmış, /AA-/-dan (Standart& Poor's, Fitch) və yaxud /Aa3/-dən (Moody's) aşağı olmayan kredit reytinqinə malik olan, 31 dekabr 2007-ci il tarixindən saxladığı məcmu aktivlərin həcmi 2.5 trln. ABŞ dolları səviyyəsindən aşağı olmayan maliyyə institutları iştirak edə bilərlər.
Tenderdə iştirak etməkdə marağı olanlar iştirak haqqının ödənilməsini təsdiq edən sənəd, hüquqi statusunu əks etdirən hüquqi sənədlərin (Nizamnamə, dövlət qeydiyyatı haqqında şəhadətnamə və ya reyestrdən çıxarış və s.) müvafiq qaydada təsdiq edilmiş surətlərini təqdim etməlidirlər. İştirak üçün ödəniş haqqı $1 min təşkil edir. İştirak etmək üçün sənədlər mayın 12-dən gec olmayaraq təqdim edilməlidir.Tender təkliflərinin qiymətləndirilməsi maliyyə amili, xidmət şərtləri, hesabatlılıq, texnologiyalar və əsas şərtlər toplusunda göstərilən digər üstünlük meyarlarına əsasən həyata keçiriləcək.
Xidmətin göstərilməsi qeyri-müəyyən müddətə nəzərdə tutulur və 2 ay əvvəldən xəbərdarlıq etməklə müqaviləyə xitam verilə bilər.
Kastodial xidmətlərin göstərilməsi üçün Azərabaycanın Dövlət Neft Fondu The Bank Of New York-u cəlb edib. Fondun bütün Qiymətli Kağızlar portfeli bu bankın saxlanmasına verilib.
Məqalə müəllifinin ünvanı: [email protected]