Azərbaycan, Bakı, 16 aprel / Trend / Əsasən aviasığorta sahəsi üzrə ixtisaslaşan Azərbaycanın iri sığorta şirkəti "Azal Sigorta"nın 2007-ci ilin yekunları üzrə sığorta haqları 13,97 mln. manat, sığorta ödəmələri isə 829 min manat təşkil edib. Bu barədə şirkətin çərşənbə günü yayılan məlumatında bildirilir.
Ötən il təkrarsığorta əməliyyatları üzrə şirkətin sığorta haqları 192 min manat təşkil edib.
Şirkətin məlumatında bildirilir ki, 2007-ci ildə şirkətin aktivləri 2,9 mln. manat, balans mənfəəti isə 1,3 mln. manat təşkil edib.
Şirkət 2007-ci ildə 567,1 min manat mənfəət vergisi, 228,1 min manat isə gəlir vergisi ödəyib.
Təsisçisi AZAL Dövlət Konserni olan "Azal Sigorta" şirkəti 1995-ci ildən fəaliyyət göstərir. 2008-ci il yanvarın 1-nə olan vəziyyətə görə, şirkətin Nizamnamə kapitalı 1 mln. manat təşkil edib. "Azal Sigorta" sığortanın 12 könüllü və 2 icbari növü üzrə xidmət göstərir.
