Azərbaycan, Bakı, 14 may/ Trend , müxbir S.Babayeva/Azərbaycanın Əmək və Əhalinin Sosial Müdafiəsi Nazirliyi 2007-2011-ci illəri əhatə edən Dövlət Proqramı çərçivəsində, ölkədə işsizliyin azaldılması üçün regionlarda bu ilin ilk yarmarkaların keçirilmə tarixlərini müəyyən edib. Bu barədə çərşənbə günü nazirliyin Baş məşğulluq İdarəsindən məlumat veriblər.
"İlk yarmarkalar mayın 23-də Qobustanda, mayın 30-da isə Neftçalada keçiriləcək", - idarədən bildiriblər.
Yarmarkalar mayda başlayacaq və ilin sonunadək davam edəcək. Bu ilin sonuncu yarmarkasının dekabrda, Bakıda keçirilməsi planlaşdırılıb. Ümumilikdə yarmarkaların ölkənin 55 region və şəhərində keçirilməsi nəzərdə tutulub. Lakin, bu rəqəmin artacağı istisna edilmir.
Əmək Nazirliyi 2007-ci ildə Azərbaycanın 55 regionunda 57 yarmarka keçirib. Bunun nəticəsində 9056 nəfər işlə təmin edilib.
Dövlət Statistika Komitəsinin məlumatına əsasən, yanvar-martda rəsmi olaraq qeyddiyatdan keçmiş işsizlərin sayı 451,3 min təşkil edib. İşsizlərin 48 faizini qadınlar təşkil edir. Azərbaycanda bir iş yerinə rəsmi olaraq qeyddiyatdan keçmiş dörd nəfər iddia edir.
Müəlliflə əlaqə saxlamaq üçün elektron ünvan: [email protected]
