Azərbaycan, Bakı, 27 may / Trend , müxbir U.İsmayılova/ Mayda Azərbaycan Milli Bankı nəzdində Azərbaycan İpoteka Fondu (AİF) Beynəlxalq mənzil maliyyələşdirilməsi İttifaqına ("IUHF") üzv qəbul olunacaq. Bu haqda çərşənbə axşamı Fonddan verilən məlumatda bildirilib.
" Təşkilatın sıralarına daxil olması Fondun kredit vəziyyətinin təkmilləşdirilməsinə şərait yaradacaq", - AİF-dən bildirilib.
Fondun təşkilata üzv qəbul olunması beynəlxalq tərəfdaşların siyahısının genişləndirilməsi üzrə İpoteka Fondunun planları çərçivəsində reallaşdırılıb.
AİF-dən bildirilib ki, saziş çərçivəsində təşkilatın ekspertləri əmlak bazarının qiymətləndirilməsi və öyrənilməsi üçün Azərbaycana gələcəklər.
Beynəlxalq mənzil maliyyələşdirilməsi İttifaqı ("IUHF") 1941-cü ildən fəaliyyət göstərir. Təşkilatın qərargahı Londonda yerləşir. "IUHF" - qeyri- kommersiya ictimai birliyinin məqsədi mənzil maliyyələşdirilməsi sahəsində qabaqcıl təcrübə və yeni texnologiyaların yayılması, həmçinin, əmlak bazarı peşəkarlarına hərtərəfli kömək göstərməkdir. Dünyanın 60-dan çox ölkəsi "IUHF"-in üzvüdür.
Azərbaycan İpoteka Fondu 2007-ci ilin yayında vəsait çatışmazlığına görə, ipoteka kreditlərinin verilməsini dayandırıb. 2006-cı ildə dövlət büdcəsindən Fonda 26 mln. manat, 2007-ci ildə isə - 20 mln. manat ayrılıb. 2008-ci il üçün təsdiq olunmuş Azərbaycan Dövlət büdcəsinə əsasən, ipoteka kreditinin maliyyələşdirilməsi üçün 34 mln. manat ayrılıb. Hələ ki Fond ipoteka kreditlərinin maliyyələşdirilməsinə başlamayıb.
Azərbaycanın maliyyə naziri Samir Şərifovun əvvəllər dediyi kimi.ö Fond tərəfindən ipoteka kreditlərinin yenidən maliyələşdirilməsinə 2008-ci ilin ikinci yarısından başlanılacaq.
Müəlliflə əlaqə saxlamaq üçün elektron ünvan: [email protected]
