Azərbaycan, Bakı, 03 iyun/ Trend / Azərbaycan Dövlət Neft Şirkəti (ARDNŞ) sentyabrda Moody`s və Fitch Ratings şirkətlərinə təqdim etmək üçün sənədlərin beynəlxalq standartlar üzrə hazırlanmasını başa çatdırmağı planlaşdırır. Bu şirkətlərlə beynəlxalq reytinqin alınmasına dair saziş bağlanıb. Bu barədə jurnalistlərə çərşənbə axşamı ARDNŞ-nin maliyyə üzrə vitse-prezidenti Süleyman Qasımov məlumat verib.
Beynəlxalq reytinqin alınması ARDNŞ-ə öz qiymətli kağızlarını dünya bazarlarında yerləşdirmək imkanı verəcək. ARDNŞ güman edir ki, qiymətli kağızlar $300-500 mln. məbləğində yerləşdiriləcək.
"Hesabatla işlərin başa çatmasına yaxın biz öz qiymətli kağızlarımızı müxtəlif investisiya fondlarında yerləşdirmək üçün təşkilatçı-bank axtaracağıq", - Qasımov bildirib.
"Amerika bazarı çox tələbkardır. Düşünürəm ki, biz bu bazara növbəti ildə - iki il üçün hesabatlara [BMHS üzrə] malik olduqdan sonra çıxa biləcəyik", - Qasımov bildirib.
Onun sözlərinə görə, ARDNŞ qiymətli kağızların yerləşdiriləcəyi bazarı hələ müəyyən etməyib.
ARDNŞ vitse-prezidentinin sözlərinə görə, Amerika sərmayədarları Dövlət Neft Şirkətinin qiymətli kağızlarının təqribən 70 faizini almaq istəyirlər. Belə ki, "onlar Azərbaycanı daha yaxşı tanıyırlar və onların təklifləri yaxşıdır". Lakin, ARDNŞ qiymətli kağızların Avropa və Asiyada yerləşdirilməsini istisna etmir.
