Azərbaycan, Bakı, 04 iyun / Trend , U.İsmayılova/ İri xarici sığorta şirkətləri Azərbaycanda həyat risklərinin sığortalanmasına maraq göstərməyə başlayıb. Bu barədə çərşənbə günü Azərbaycanın aparıcı sığorta şirkətlərindən biri olan "Pasa Sigorta"nın baş direktoru Nofəl Rzayev bildirib.
"Life sığortada maraqlı olan iri sığorta şirkətləri arasında Fransanın "SCOR life", Amerikanın "AIG - life" və Almaniyanın "Allianz Life" şirkətləri var", - deyə Rzayev bildirib.
Azərbaycanda martın 15-dən "Sığorta fəaliyyəti barədə" yeni Qanun qüvvəyə minib. Qanuna əsasən, şirkətlər "Life" sığorta və "Non-Life" sığorta üzrə iki törəmə şirkətə ayrılmalıdır.
Rzayevin sözlərinə görə, bu şirkətlər üzərinə böyük risklər götürən təkrar sığortaçılar kimi, Azərbaycanın həyat sığortası bazarında iştirak etmək niyyətindədir. Hazırda Azərbaycanda 28 sığorta və bir təkrarsığorta şirkəti fəaliyyət göstərir.
Azərbaycanda həyat sığortası daha geniş yayılmış sığorta növləri sırasına daxil deyil və cəmi bir neçə şirkət bu xidmət növü ilə məşğul olur. Ölkədə ən məşhur və inkişaf etmiş sığorta növü KASKO və OSAQO hesab olunur.
Məqalə müəllifi ilə əlaqə ünvanı: [email protected]
