Azərbaycan, Bakı, 17 iyun/ Trend , müxbir İ.Xəlilova/ Azərbaycan Aşqabadda keçirilən birinci Azərbaycan-Türkmənistan biznes-forumunda ölkənin investisiya imkanlarının təqdimatını keçirib. Bu barədə çərşənbə axşamı Azərbaycanın Türkmənistandakı fövqəladə və səlahiyyətli səfiri Elxan Hüseynov məlumat verib. Biznes-forum bu gün Türkmənistan paytaxtında öz işini davam etdirəcək. Forumda iştirak edən 26 nəfərdən ibarət Azərbaycan nümayəndə heyətinə Azərbaycan İxrac və İnvestisiyaların Təşviqi Fondunun (AZPROMO) prezidenti Emil Məcidov başçılıq edir.
Türkmən nümayəndə heyətinə Ticarət-Sənaye Palatasının prezidenti Palvan Taqanov başçılıq edir.
"Türkmənistan prezidenti Qurbanqulu Berdıməhəmmədov bu gün Azərbaycanın nümayəndə heyətinin başçısını qəbul edib", - səfir bildirib.
Tikinti materialları istehsalı, tikinti, qida sənayesi, turizm sahələrindəki şirkətlər biznes-forumda iştirak arzusunda olduqlarını bildiriblər.
"Bütün bu sahələr xarici sərmayələr üçün kifayət qədər cəlbedicidir və biznes-forum Azərbaycan və Türkmənistan iqtisadiyyatlarının yaxınlaşmasına təkan verəcək", - Məcidov Aşqabada yola düşməzdən əvvəl bildirib.
AZPROMO rəhbərinin rəyinə görə, foruma belə böyük maraq olduğu şəraitdə, gələcəkdə Azərbaycan və Türkmənistan arasında müxtəlif sahələr, xüsusilə də tikinti, kimya və qida sənayesi, turizm, maliyyə sahəsi, emal, metallurgiya və s. sahələr üzrə biznes-forumlar təşkil etmək planlaşdırılır. Bundan əlavə, ölkənin yaxın olması və əməkdaşlıq üçün böyük imkanları nəzərə almaqla, Türkmənistan bazarını xammal bazası kimi istifadə etmək olar (tikinti materialları, meyvə və tərəvəz),- Məcidov hesab edir.
Azərbaycanın statistikasına əsasən, ötən ilin yekunları üzrə iki ölkə arasında mal dövriyyəsi $53,9 mln. təşkil edib. İdxal əməliyyatlarının payına $40,3 mln. düşür. Lakin birinci rübdə xarici ticarət əməliyyatlarında Azərbaycan mallarının ixracı üstünlük təşkil edir - $8,9 mln. ümumi mal dövriyyəsinin $5,4 mln.-u.
Azərbaycan və Türkmənistan hökumətləri yaxın iki - üç ildə mal dövriyyəsinin $500 mln.-dək çatdırılması barədə qarşılarına vəzifə qoyublar.
İyunun 17-nə olan rəsmi məzənnə - 0,8176 AZN/USD.
Müəlliflə əlaqə saxlamaq üçün elektron ünvan: [email protected]