Azərbaycan, Bakı, 14 iyul/ Trend / Unibank KB 2008-ci ilin birinci yarımili üçün maliyyə göstəricilərinə yekun vurub. 2007-ci ilin yanvar-iyun aylarının nəticələri ilə müqayisədə, aparıcı maliyyə göstəriciləri üzrə sabit artım müşahidə olunur.
Bankın aktivləri, 2007-ci ilin iyun ayı ilə müqayisədə 89% artaraq, 479,397 mln. AZN təşkil edib. Bu, 2008-ci ilin yanvar ayının 1-nə olan müvafiq göstəricidən 23% çoxdur.
Bankın kreit portfeli, il ərzində 140% artaraq, 358,761 mln. AZN təşkil edib. Bu, 2008-ci ilin yanvar ayının əvvəlinə olan göstəricidən 31% çoxdur.
2008 -ci ilin iyul ayının 1-nə olan vəziyyət üçün, Bank tərəfindən cəlb olunan depozitlərin həcmi 145,395 mln. AZN təşkil edib. Bu göstəricinin illik artımı 52,5%, 2008 -ci il ərzində artımı isə, 17,95% olub.
Birinci yarımilin yekunlarına görə, Bankın gəliri 39,612 min AZN təşkil edib ki, bu da ötən ilin eyni dövründən 167% çoxdur. Bankın xərcləri il ərzində 137% artmış və 34 064 min AZN təşkil etmişdir. Unibank-ın balans gəliri, 2007-ci ilin analoji dövrü ilə müqayisədə, 12 dəfə artımla, 5 548 min AZN təşkil edib.
Unibank Azərbaycanın iri özəl banklarından biridir. Unibank maliyyə göstəricilərinə görə liderlərin üçlüyünə daxildir. Bankın Nizamnamə kapitalı 15 mln. AZN təşkil edir. Ümumi kapital 36,5 mln. manatı ötür. 2007-ci ilin yekunları üzrə bankın aktviləri 390 mln. təşkil edir. Kredit portfeli 270 mln. manatı ötür. Bankın rəsmi auditoru PricewaterhouseCoopers şirkətidir. Bankın səhmdarları sırasına Avropa Yenidənqurma və İnkişaf Bankı (AYİB) və Alman İnvestisiya Korporasiyası - DEG daxildir.
